Sansone, Giuseppe. Per il testo della tenzone fittizia attribuita a Peire Duran. "Romania", 118 (2000), pp. 219-235

Codi: 234,008 Autor: Peire Duran Gènere: Tenso ficticia Número:

 

Una dona ai auzit que s’es clamada

I	1	Una dona ai auzit que s’es clamada
		de son marit, e sai·us dir de que·s rancura:
		qu’anc non lo·y mes mas de mieg, pus li fon dada;
		e d’aquo volia que·l fezes drechura,
	5	que la falhida e·l dan
		li esmende d’er enan
		e que no·l fes tort en re
		d’aquo que li·n arete.
II		E son marit li respos si com l’agrada,
	10	et dis razo per que lo·j mes de mezura:
		major l’a que negus hom de l’encontrada;
		e temeria que fos de mort segura
		si non l’anava palpan,
		c’a desmezura l’a gran:
	15	ausir la poiria be
		si no·l avia merce.
III		«Tot aiso que l’auzes dir es guabaria
		a mo marit, qu’ieu non cug n’aja sobreira;
		ni la mitat d’aco que di cre que sia,
	20	que·l frachur’ay ieu sentid’ e la nessieira.
		E ditz que aussiria m’en,
		et ieu no·n ai espaven;
		ans l’a a mos obs petit,
		e d’aco eys a mentit.»
IV	25	«Molher, vos aves dezir de gran folia!
		E deuria vos ben castiar la premieira,
		qu’ieu l’ausis, c’anc non ac autra malautia:
		e vos volriatz morir d’aital maneira?
		S’ieu non agues tan de sen
	30	com ai avut chauzimen,
		pessaza for’ essernit
		de vos: e no m’es grazit.»
V		«Marit, de trastot lo dan vos fas fi faire
		e del mal que·m podetz far, al mieu albire:
	35	si m·en podetz far sentir qu’en crit ni·n braire
		per iustiziar mi en ren e per ausire.
		E darai vos batallier
		que·us vensera, mas no fier;
		e platz li cant es feritz,
	40	e ies non es mens arditz.»
VI		«Molher, pos per messongier
		m’avetz, metrai lo·us entier:
		pus lo fleis no m’es grazitz,
		e issir n’a l’esperitz!»
VII	45	«Maritz, ja part no·us enquier
		del valeissen d’un denier;
		que mans gabs avem auzitz
		que non eran mas los critz!»