Jeanroy, A.. Poésies provençales inédites d'après les manuscrits de Paris. "Annales du Midi", 17 (1905), pp. 457-489

Codi: 243,008 Autor: Guiraut de Calanso Gènere: Canso Número: III

 

Li mey dezir

I	1	Li mey dezir
		E li mey pensamen
		Li dous talen
		E tug li mey cossir,
	5	Mos gaugz, mos bes,
		Mos thezaurs e m'amors
		E ma valors
		E·l bes que m'es promes
		Etz, dona, vos,
	10	Qu'als non ai retengut
		En aquest mon
		Qu'als majors ops mi tenha jauzion,
		Mas sol de vos cuy ai mon cor rendut,
		Cuy am e lau e tem e ser e blandi.
II	15	E quan m'albir
		Del vostre cors plazen,
		Guay, avinen
		Los bes, qu'ieu no sai dir,
		Cum es cortes,
	20	Ni quals es vostr’ onors
		E la ricors,
		Adoncx consir e pes,
		Tan suy joyos,
		Que be m'es avengut,
	25	Don' ab pel blon,
		Quar tan vos am ni n'ai cor deziron
		Del gensor cors qu'om sap vestit ni nut:
		Doncx ben suy folhs s'autra·n quer ni·n demandi.
III		E pus chauzir
	30	Me fes Amors tan gen,
		Per chauzimen,
		No·m vulhatz far murir,
		Qu'estranh[z] dols es
		E salvatja dolors
	35	E greus clamors.
		Qui pert los ans e·ls mes
		E reman blos
		Del lonc joy atendut.
		Quan no sap don
	40	Aja mais be, tan l'eis del cor prion
		Sa grans dolors, quar si l'a esperdut
		Cest' ira e tem... Mas alhors la comandi.
IV		Qu'ieu·s puesc plevir
		Plus vos am leyalmen
	45	Ab sufrimen
		Que·l maritz ab jauzir;
		Doncx, francha res,
		Un dels cent bes majors
		O dels menors
	50	Volguessetz qu'ieu n'agues.
		Q'us anguoyssos
		Dezirs m'a si vencut
		Que·l cor me fon
		De l'enveya que m'auci e·m cofon,
	55	Quar hieu non ai amic que m'en ajut,
		Mas sol de vos, qu'autra no·n prec ni·n mandi.
V		E doncx si·m vir
		Vas lo bon rey valen.
		De pretz manen,
	60	De Castella, no us tir
		Qu'a pretz conques
		Sobre·ls emperadors
		E·ls reys forsors
		E·ls princeps e·ls marques,
	65	Los pretz e·ls dos,
		Qu'aissi·s perdon vencut, —
		Cum mars rescon
		Los noms dels flums, — tug l'autre pretz que son,
		Lai on del sien ha, sol i es mentaugut:
	70	Per qu'ieu noy falh si l retrac ni l'espandi.
VI		E sal lo Dieus ad honor e ajut,
		Quar es vas Pretz tals quo·l vuelh ni·l demandi.