De Bartholomaeis, Vicenzo. La tenson de Taurel et de Falconet. "Annales du Midi: revue archéologique, historique et philologique de la France méridionale", 70 (1906), pp. 172-195

Codi: 438,001 Autor: Taurel Gènere: Tenso Número:

 

Falconet, de Guillalmona

I	1	Falconet, de Guillalmona
		us veig enamorat,
		el marqes de Monferat
		fai pechat qe no laus dona;
	5	q'anc mais tan bon rofian
		no vim per menar putan,
		ni miels sapcha la via del bordel;
		e tain se ben la malsana al mezel!
II		Molt fo vostra lanza bona,
	10	Taurel; per mon grat,
		non fora al desbarat;
		qant anavatz vas Cremona,
		maint cavallier e vilan
		auzizetz de vostra man;
	15	pero pechat non aguest el mazel,
		qe totz prumers fugitz vostre vedel.
III		Falconet, cel qius abeta
		non fa qe cortes,
		ni la rauba del marqes
	20	nous enconbra la boneta;
		oimais pot vostre roncis
		anar plus leus pels camis,
		e qant seres albergats en Postal,
		la noig, siatz segurs de manjar mal.
IV	25	Non crei qeus don nius prometa,
		Taurel, d'aqest mes;
		ronciners joglars, plaides,
		pron sabetz de la falveta
		se ja de Guillem Rentis,
	30	trahetz chavals ni roncis,
		anz portaretz armas de mon segnal,
		pois donara ad amdos per igal
V		Lo segners de Tartarona
		veig q'es meilluratz:
	35	bastis castels e fossatz,
		e guerreja e met e dona,
		e rauba ser e matin
		las estradas el camin,
		e a promes al fol de Gallian
	40	lo palafre del prumer mercadan.
VI		Fe q'ieu deig na Guillelmona,
		Taurel, per senat
		teingl marqes de Monferat;
		ben li taing portar corona,
	45	q'aissi trais sa guerr'a fin
		com fetz Rainaltz a Sengrin
		qu'ab flansa destruis Passijan,
		ma miels conquis l'emperaire Milan.