Appel, Carl. Poésies provençales inédites tirées des manuscrits d’Italie. "Revue des langues romanes", 34 (1890), pp. 5-35

Codi: 162,008 Autor: Garin d'Apchier Gènere: Sirventes Número: [VII]

 

Veill Comunal, ma tor

I	1	Veill Comunal, ma tor
		ai cobrad' ad honor,
		car bon envaidor
		non pot hom leu faidir;
	5	qu'a vos o auzi dir;
		per que·m mis en la via
		e fi·n cellui issir
		que a tort la tenia;
		don sapchon mei amic,
	10	tuich, li paubr'e li ric,
		qu'ieu guerrai so que dic,
		puois sus son, don issic.
II		Quim'apela traichor,
		el men per mieg lo mor;
	15	mas quar al meu seignor
		podion ren laich dir,
		eu non o volc soffrir;
		ni voill que tracher sia;
		e saup lo meillz garrir
	20	qu'el eus no se·n garia,
		qu'en aissi se·n partic
		qu'anc colbe no·i feric,
		et eu fi so qu'ieu dic,
		que·l pris e no·l retic.
III	25	Ben viu a grant honor
		qui pert son mal seignor,
		qu'ieu perdei lo peior
		qu'anc morz pogues aucir,
		mas eu non, puois moric;
	30	ni non voill qu'om m'aucia;
		per ma vida gandir
		garni la maison mia
		. . . . . . . . . . . . .
		. . . . . . . . . . . . .
	35	. . . . . . . . . . . . .
		. . . . . . . . . . . . .
IV		Si be·s fan gabador
		li fillat e·ill oissor,
		Monlaurs fai sobre lor
	40	sos honraz faiz auzir;
		e quant l'auzon venir,
		no·l serron ges la via,
		anz lor a faich gequir
		l'orgoill e·ill gaillardia;
	45	e parec a Nou-Vic,
		on preiron tal destric
		que quan l'estors partic,
		el remas pres en gic.
V		Ges no me don paor
	50	per lor dig de folor,
		si tot quatre comtor
		mi menasson d'aucir;
		quar en els po venir
		anz qu'e mi la moria;
	55	et yen, podes lor dir,
		prec dieu a cascun dia
		que gotela me fic
		el lag mal don moric
		uns comtors, qu'ieu ausic
	60	qu'anc preveire non vic.