Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 026,001 Autor: Arnaut de Brantalo Gènere: Chanson religieuse Número: III

 

Pessius, pessans, peccans e penedens

I	1	Pessius, pessans, peccans e penedens
		planc en ploran; preian planc mos peccatz
	3	don anc falhi en cutz ni en pessatz
		ni en folhs digz ni en faigz decebens;
		e quar suy fortz e forfaitz follamens,
	6	clam merceyan merce, merceyamens
		a selh que es unitz et unitatz
		e trinables e tres en trinitatz,
	9	qu’elh me perdo, qu’es perdonans perdos,
		cum perdonet als periurs perilhos.
II		Qu’elh es leos et homs complidamens,
	12	aygla-vedelhs doblamens figuratz;
		e bos espers e fes e veritatz,
		fis senes fin e vers comensamens,
	15	e portz salvan ab complitz guerimens,
		e doussa fons bayssan totz mals talens;
		caps de totz bes, merces e caritatz
	18	e ioys entiers e franc’humilitatz
		e pas pleniers que del cel vene sa ios
		per desliurar los greus mals enguoyssos.
III	21	Et es fis rays sobre totz resplandens,
		don anc nulh temps no·s mermet sa clartatz,
		e dous anhels per cuy fon restauratz
	24	de tot lo mon lo sobriers perdemens:
		qu’ins en infern avian intramens
		los bos e·ls mals ses totz retenemens
	27	tro elh nasquet e fo marturiatz,
		don l’aunitz locx remas espoliatz,
		e lay laysset los mals e pres los bos
	30	qu’al sant pujar triet per companhos.
IV		Et es vida, guitz e consolamens,
		pastres e lutz e primiers engenratz,
	33	e dregz camis, peira e fermetatz,
		e de totz bes totz entiers complimens,
		e sans espos ses nulh corrumpemens,
	36	e mayestres de totz melhuyramens,
		e clars solelhs per cuy es aut puiatz
		lo menre be e·l mager mal bayssatz,
	39	vertutz e bras misericordios,
		e nonmortals e sans e poderos.