Corpus des Troubadours

Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

I	1	Dieus verays, a vos mi ren
		que de la verge fos natz
	3	e per nos en crotz levatz;
		vos quier merce humilmen,
		que·m perdonetz los mortals
	6	falhimens e·ls venïals
		qu’ay faitz en tota ma via.
		Dieus, filhs de sancta Maria,
	9	Ihesu Crist, on gaug s’espan:
		per la vostra merce gran
		no·y gardetz la colpa mia.

II	12	Senher, ab cor peneden
		vos quier merce dels pecatz
		qu’ai faitz ni digz ni pessatz
	15	de pus vinc a naissemen:
		qu’ieu ai estat deslials
		vas vos en est segle fals,
	18	per que, Dieus, perdo·us querria;
		e vos, maire de Dieu pia,
		pregatz ne lo vostr’efan
	21	que·us comandet a Johan
		quan sus en la crotz pendia.

III		Senher que sus el turmen
	24	fos de la lansa nafratz,
		si que·n yssi pels costatz
		sancs et aigua eyssamen,
	27	don totz lo pobles es sals,
		si que·l princeps ynfernals
		no·y a·l poder que solia:
	30	vostra passïos me sia
		defendens, que no m’engan
		l’enemicx, que·m vai temptan,
	33	anticx qu’es ples de feunia.

IV		Senher qu’el sanh monimen
		fon lo vostre cors pauzatz
	36	e fon dels iuzieus gardatz
		lo sanh sepulcre garnen,
		fazen el vas lur senhals,
	39	e vos, reys celestïals,
		ressuscitetz al terz dia:
		la vostra terna paria
	42	prec que·m defenda de dan,
		de mort subtana gardan
		mon cors e de vilania.

V	45	Reyna del firmamen,
		la vostra verginitatz
		mi gart qu’ieu non sia temptatz
	48	per l’angel percussïen,
		e·m do que viva leyals,
		e·m defenda de totz mals,
	51	e no fassa ren ni dia
		si doncx a Dieu non plazia;
		e me lays far de ben tan
	54	que, quan morrai l’arma·s n’an
		en la vostra companhia.

VI		Senher, dels bes temporals
	57	me donatz tans que savals
		iamais frachuros no sia:
		quar ab aitan pro n’auria;
	60	e prendetz en grat ses chan
		qu’ieu pro fi de bon talan
		a la vostra senhoria.