Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 071,002 Autor: Bernart de Venzac Gènere: Alba religieuse Número: VI

 

Lo Pair'e·l Filh e·l Sant Espirital

I	1	Lo Pair’e·l Filh e·l Sant Espirital
		entre totz tres, e vos, verges Maria,
	3	nos gart, si·lh platz, del mal fuec ifernal
		e del turmen que no falh nueg ni dia;
		e que fassam totz lo sieu mandamen,
	6	si que venguam ioyos e resplanden
		el sieu regne, aissi cum resplan l’alba.
II		Los archangels e·ls angels atretal
	9	e totz los sans don la cortz es complia
		preguon per nos del falhimen mortal,
		qu’el nos perdon, lo Filh, reyna pia,
	12	selh que per nos sufric mort e turmen
		e passïo, so sabem veramen,
		e de si eys nos fa clardat et alba.
III	15	Dieus, vostr’amor[s]  e gaug celestial
		e la doussor[s] de la vostra paria
		nos gui’e·ns guar; e nos que sïam tal
	18	que capïam en vostra companhia,
		e que vas vos no fassam falhimen,
		ans vos amem de bon cor leyalmen,
	21	si que su·l cel nos mostretz la vostr’alba.
IV		Be·m meravelh car tug non em aital
		co·l senhor reys nos braila e nos cria,
	24	c’ades nos di c’anem resebre·l [real]
		que el nos te aparelhat quec dia;
		donc ascultieu: car non anam corren?
	27	Car no sabem de la nueg cora·ns pren
		ni se·ns venrem en loc on veyam l’alba.
V		Selh que per nos det son sanc natural
	30	e se liuret e se mes en baylia,
		et en la crotz fon levatz atretal
		e clavellatz e coronatz d’espia,
	33	nos don a far qu’al iorn del iutjamen
		los nostres tortz no·l sian remembramen,
		ans ab gran gaug nos men en la su’alba.
VI	36	Belh’estela d’orïen, Dieus vos sal.
		Tug preguem Dieu que nos don bon ostal
		en paradis, on es clars iorns et alba.