De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 236,012=437,038 Autor: Guilhem de la Tor, Sordel Gènere: Tenso (partimen) Número: XCVII

 

Uns amics et un’amia

I	1	«Uns amics et un’amia,
		Sordels, an si un voler
		Q’, a lor semblan, non poiria
		L’uns ses l’autra joi aver;
	5	E, si l’amiga moris
		Aissi qe l’amics o vis,
		Qui no la pot oblidar,
		Queill seria meillz a far:
		Apres lei viure o morir?
	10	Digatz de so vostre albir».
II		«Guillems, tant am ses bausia
		Lei qem ten en son poder,
		Que senes lei non volria
		Viure, per negun aver;
	15	Per qe de l’amic m’es vis
		Qe, si mortz de lui partis
		Lei, on a tot son pensar,
		Qe meillz li seria anar
		Lai, ab lei, qe sai languir
	20	Totz temps, e dolor soffrir».
III		« Sordels, ja pro noi auria
		L’amiga, so sai en ver,
		Si l’amics per lei moria,
		E farias fol tener,
	25	Per qel viures li es plus fis;
		E N’Andreus, sitot s’aucis,
		Noi gazaingnet ren, som par;
		E vos sabez mal triar;
		C’om non deu aso seguir
	30	Don pot ses ben mals venir».
IV		« Guillems de la Tor, follia
		Mantenez, al mieu parer;
		Com podez dir qe deuria
		Vida meillz qe morz valer
	35	A cellui qe nos jauzis
		De joi, e toz temps languis?
		Q’anz q’el o degues durar,
		El mezeis, ses tot doptar,
		Se deuria enanz ausir,
	40	S’esters non pogues fenir».
V		« En Sordels, eu trobaria
		A ma razon mantener
		Plus que vos de compaingnia;
		So devez vos ben saber
	45	Q’en mort non a jocs ni ris,
		E vida atrai et aisis
		Mainz bens, qils sab percassar;
		Per qe deu laissar estar
		So don plus nois pot jauzir
	50	L’amics, es deu esbaudir».
VI		«Ja tant no s’esbauderia,
		Guillems, qe, qant del plazer
		C’aver sol li menbraria,
		Q’el se pogues ja tener
	55	Que dols e plors nol marris;
		E, s’il ab sidonz fenis,
		Poirian l’adreit lauzar
		Li amador de ben amar,
		E serian li cossir
	60	Fenit, eil plor eil sospir».
VII		«Sordels, car verais prez fis
		Es a N’Azalais aclis,
		De Vizalaina, me par
		Qe deja aquest plait jujar;
	65	E so q’ella en volria dir
		Deu ben a toz abellir».
VIII		«Car toz hom pros s’abellis
		De Na Cuniza e grazis,
		Guillems, son valen prez car,
	70	Tanh c’ab N’Alais deja far
		Lo jujamen e complir,
		E tuit lo devem grazir».