Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 106,010 Autor: Cadenet Gènere: Chanson religieuse, chanson de pénitence Número: IX

 

Be volgra, s'esser pogues

I	1	Be volgra, s’esser pogues,
		tot lo mal qu’ai faitz desfar,
	3	e·l ben qu’ieu non ai faitz far.
		Ay, cum m’en fora ben pres
		sil bes fos mals e·l mals bes!
	6	Aissi no·m calgra doptar,
		anz fora lo bes tant grans
		qu’ieu fora pars d’un dels sans.
	9	Ara no say cum s’anara de me:
		tan son li mal gran e petit li be.
II		Tant mi sent vas Dieu mespres
	12	qu’ieu·m cugiey desesperar;
		mas say que non o dei far,
		car mager es sa merces
	15	qu’el mieus grans peccatz non es.
		Aisso·m fai assegurar;
		pero be volgra tres tans
	18	viure de iornals e d’ans
		a sa honor, per miels trobar merce,
		cum l’ay estat fals e de mala fe.
III	21	Be sai, si ia·m val merces,
		que merces sera ses par;
		sol aisso·m deu esglayar,
	24	ia ren plus fach non agues,
		mas las setmanas e·ls mes
		e·ls ans qu’ai laissatz passar
	27	qu’ieu no fuy de Dieu membrans:
		sol aisso·m deu esser dans,
		quar guazardo non a hom de non-re,
	30	e quer l’a tort qui non a fach per que.
IV		Verais Jhesucrist, no·us pes
		si de re vos aus preyar
	33	merces: No·m laissetz cobrar
		al dïable que·m tenc pres;
		e car anc fi qe·il plagues
	36	al cors, o vendetz tot car;
		al cors qu’a faitz los engans
		en sia faitz lo demans;
	39	lo cors n’aia la pena qe·il cove,
		qu’elh a trahit l’arma e vos e se.
V		Be sai que tart mi sui pres
	42	vas Dieus a merce clamar:
		mas vos mi mandetz, so·m par,
		que, calora qu’eu vengues,
	45	no·m soanariatz ges.
		E fora temps d’albergar!
		Pero be volgra enans
	48	laissar mos fallimens grans;
		qu’en vostra cort non pot intrar, so cre,
		nulhs hom tacatz de nulha laia re.
VI	51	Segles desleyals, truans,
		fals ensenhaire d’enguans!
		Ab vos non a nulhs hom honor ni be
	54	pueys ama Dieu ni·l tem ni·l blan ni·l  cre.