De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 437,024 Autor: Sordel Gènere: Planh Número: CXXX

 

Planher vuelh En Blacatz     en aquest leugier so

I	1	Planher vuelh En Blacatz     en aquest leugier so,
		Ab cor trist e marrit;     et ai en ben razo,
		Qu’en lui ai mescabat     senhor et amic bo,
		E quar tug l’aip valent     en sa mort perdut so;
	5	Tant es mortals lo dans     qu’ieu noy ai sospeisso
		Que jamais si revenha,     s’en aital guiza no:
		C’om li traga lo cor     e qu’en manjol baro
		Que vivon descorat,     pueys auran de cor pro.
II		Premiers manje del cor,     per so que grans ops l’es,
	10	L’Emperaire de Roma,     s’el vol los Milanes
		Per forsa conquistar,     quar lui tenon conques
		E viu deseretatz,     malgrat de sos Ties;
		E deseguentre lui     manj’en lo Reis Frances:
		Pueys cobrara Castella     qu’el pert per nessies;
	15	Mas, si pes’a sa maire,     el non manjara ges,
		Quar ben par, a son pretz,     qu’el non fai ren quel pes.
III		Del Rei Engles me platz,     car es pauc coratjos,
		Que manje pro del cor ;     pueys er valens e bos,
		E cobrara la terra,     per que viu de pretz blos,
	20	Quel tol lo Reis de Fransa,     quar lo sap nualhos;
		E lo Reis Castellans     tanh qu’en manje per dos,
		Quar dos regismes ten,     e per l’un non es pros;
		Mas, s’el en vol manjar,     tanh qu’en manj’a rescos,
		Que, sil mair’o sabia,     batrial ab bastos.
IV	25	Del Rei d’Arago vuelh     del cor deja manjar,
		Que aisso lo fara     de l’anta descargar
		Que pren sai de Marsella     e d’Amilau; qu’onrar
		Nos pot estiers per re     que puesca dir ni far;
		Et apres vuelh del cor     don hom al Rei Navar,
	30	Que valia mais coms     que reis, so aug comtar;
		Tortz es, quan Dieus fai home     en gran ricor pojar,
		Pus sofracha de cor,     lo fai de pretz baissar.
V		Al Comte de Toloza     a ops qu’en manje be,
		Sil membra so que sol     tener ni so que te;
	35	Quar, si ab autre cor     sa perda non reve,
		Nom par que la revenha     ab aquel qu’a en se;
		El Coms Proensals tanh     qu’en manje, sil sove
		C’om que deseretatz viu     guaire non val re;
		E, sitot ab esfors     si defen nis chapte,
	40	Ops l’es manje del cor     pel greu fais qu’el soste.
VI		Li barom volran mal     de so que ieu dic be,
		Mas ben sapchan qu’iels pretz     aitan pauc com il me.
VII		Bels Restaurs, sol c’ab vos     puesca trobar merce,
		A mon dan met quascun     que per amic nom te.