Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 154,002 Autor: Folquet de Lunel Gènere: Chanson religieuse Número: XI

 

Dompna bona, bel'e plazens

I	1	Dompna bona, bel’e plazens,
		per vos fis ioys envers me nays
	3	ins e mon cor, quan pes qu’esmais
		avetz de nostres falhimens.
		Maires de Dieu, verges e casta e pia,
	6	mans peccadors e mantas peccairis
		attendon ioy que luns temps no falhis,
		per vostres precx, sancta verges Maria.
II	9	Dompna, vos etz razonamens
		de nostras armas ab Dieu, mais
		que res que sia, qu’els esglais
	12	non caio d’infernals turmens;
		e vos etz flors e frug don se congria
		la pia [........................................] pandis
	15	en [..................................] a nostras fis
		per vostres precx, sancta verges Maria.
III		[..............................................
	18	...............................................
		...............................................
		...............................................
	21	...........................................................
		...........................................................]
		que las portas a peccadors ubris
	24	per vostres precx, sancta verges Maria.
IV		Dompna, quan fo le nayssemens
		del vostre car filh, res no·us frays
	27	plus que franh la veiria·l rays
		del sollelh qu’es dins resplandens;
		per qu’es folhs selh qu’a vos non s’umilia
	30	que·l plus belh frug e·l plus noble noyris
		qu’anc fos; per que mant’arma reculhi·s
		per vostres precx, sancta verges Maria.
V	33	Ar preguem selh que·ls elemens
		formet e tot quan es, que·ns lays
		descargar quasqus del greu fays
	36	qu’es de las armas perdemens;
		que tant em ple d’erguelh e de bauzia
		que·l mon fora ben dignes qu’en peris,
	39	Maire de Dieu, s’el tan non obezis
		vostres cars precx, sancta verges Maria.
VI		Vostra valor, dona, dir non poria
	42	luns homs carnals —tant es vostre pretz fis—
		sal Dieus o vos, sancta verges Maria.
VII		Al mieu senhor, qu’es coms de Rodes, via
	45	tie·y, ma chansos, on fis pretz se noyris,
		e digas li·s peneda si mal dis
		de ma gensor, qu’es la verges Maria.