Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 154,006 Autor: Folquet de Lunel Gènere: Chanson religieuse Número: XII

 

Sj quon la fuelh'el ramelh

I	1	Sj quon la fuelh’el ramelh
		creys el guai temps de pascor
	3	e creys lo frug de la flor
		per gaug del dous temps novelh,
		creys mos chans e renovelha;
	6	quar aug dire qu’anc no·s seys
		plus francx coms ni pus adreys,
		e quar de tal dompna so
	9	qu’anc no fes ni dis mas pro.
II		Tan son li fach e·l dich bo
		de midons, qu’om a razo
	12	que·s laus d’amor, se l’empeys
		en amar lieys qu’anc no·s feys
		de far so per que·s capdelha
	15	fis pretz, qu’a tan en capdelh
		que rey et emperador
		penrian en lauzar honor
	18	son cors de totz mals piusselh.
III		Ia preyador conhdarelh
		no vol ni entendedor
	21	midons, mas fin amador,
		non fenhedor ni yrnelh;
		ni es fenhens ni yrnelha,
	24	ni anc no·s miret ni·s peys
		per escotar pecx dompneys,
		ni anc fis amans no·y fo
	27	ses cobrar bon gazardo.
IV		Tant es de bona faisso
		midons que melhoirazo
	30	no·y vol: quar anc non ateys
		dompna de las doas leys
		en tan aut pretz; tant es bella
	33	sa valors qu’a Dieus es belh
		tot quan fai, e·l preyador
		sieu son mai e·l lauzador
	36	que d’autra qu’om dompn’apelh.
V		Encara·m mou dreg sembelh
		qu’ieu del comte, mo senhor,
	39	de Rodes fassa lauzor;
		quar es el cap del castelh
		de valor; que de Castelha
	42	tro·l cap del mon coms ni reys
		del sieu poder mielhs no creys
		de fin pretz —ni anc no fo
	45	qu’al vis— sal del comt’Hugo.
VI		Reyna, maire piussella,
		filla de paire piusselh:
	48	vos tenc ieu per ma gensor,
		e·pros coms ditz gran error
		de Rodes qu’autra·Ns apelh.
VII	51	Empero breg’e tinelha
		vuelh aver tostemps ab eys,
		tro que del maldir se fleys
	54	qu’a digz de vos; mas quar so
		sieus li prezen ma chanso.