Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Aparat crític
* Traduccions

 

De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 242,038 Autor: Giraut de Borneill Gènere: Sirventes Número: XVII

 

Honratz es hom per desprendre

I 1 Honratz es hom per desprendre
    E pros lausatz per donar
    E blasmatz per voler prendre
    Et encolpatz per gardar
  5 L’aver; que tals qui n’a pron
    N’a pauc en breu de saison,
    E tals es en gran pojar
    Cui la rod’, en breu virar,
    Fai son gran pojar descendre.
     
II 10 Si conprars ensenh’ a vendre,
    Per dreig deuri’ hom jujar
    Que zasus degues aprendre,
    Per son prendre, ad autrui dar;
    Mas cel q’a s’entenzion
  15 En prendre, tan li sap bon
    Que de dar noil pot menbrar;
    Per qe lui deu oblidar
    Deus e l’avers, ses reprendre.
     
III   Mas per so nos deu defendre
  20 Cel qui vol larguesa far,
    Anz deu largamen estendre
    Sa man, donan ses tarzar
    E ses trobar ochaison,
    Que vol ben dire de non;
  25 Car cel don ten hom plus car
    Quant es pres ses demandar,
    Ses afan e ses atendre.
     
IV   Cel qi fai pan per revendre
    Nol sap tan prim balanzar
  30 Que plus prim nos sapch’ entendre
    Totz homs, en amesurar,
    Sos dos e sa mession;
    Cujan aissi, ab lairon,
    Per pauc gran pretz gazanhar,
  35 Mas per mesura prestar
    E tos temps mesura rendre.
     
V   Greu m’es parlars e contendre
    De cels qui van soterrar
    L’aver; don fan tal mesprendre
  40 Q’il no se podon salvar,
    S’abanz no fan redenzon
    De l’aver c’an en preison;
    Car per aver amassar
    Volc Judas Deu renegar,
  45 E al ven s’en anet pendre!
     
VI   Serventes, tals sap ton son
    Qui non enten ta razon;
    E tals l’enten quil chantar
    Vol mais que ton razonar;
  50 C’a mainz fai vergonh’ entendre.
     
VII   Bels seinher, donatz m’un don,
    Morruel, cor de baron,
    Que nous laisez de ben far,
    Nil prez, queus fai aut pojar,
  55 No laissatz per ren deisendre.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI