De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 154,001 Autor: Folquet de Lunel Gènere: Sirventes Número: CLXXVII

 

Al bon Rey q’es reys de pretz car

I	1	Al bon Rey q’es reys de pretz car,
		Reys de Castella e de Leo,
		Reys d’aculhir e reys d’onrar,
		Reys de rendre bon guiardo,
	5	Reys de valors e reys de cortezia,
		Reys a cui platz joys e solatz tot l’an,
		Qui vol saber de far bos faitz s’en an;
		Qu’en luec del mon tan be nols apenria.
II		Quar el ten cort on fadiar
	10	Nos pot nulhs hom bos en son do,
		E cort ses tolr’e ses forsar,
		E cort on escot’om razo;
		Cort ses erguelh, e cort ses vilania,
		E cort on a cent donadors, que fan
	15	D’aitan ricx dos mantas vetz ses deman,
		Cum de tals reys, qu’ieu sai, quil lor queria.
III		Mais un rey nol sai contrapar
		De largueza, s’agues tan bo
		Poder, cum elh a, de donar;
	20	So es lo franc Rey d’Arago;
		Qu’a tan son cor en valor qu’elh faria
		Pauc tot lo mon accomplir lo talan
		Qu’a en donar; e dari’ atretan
		Cum hom del mon Don Peire, s’o avia.
IV	25	Mas d’aissom fan meravillar
		L’Eligidor, qu’eligit so
		Qui puescon emperador far;
		Cum nol meto en tenezo
		De l’Emperi selh a cuy tanheria:
	30	Lo valen rey N’Anfos, qu’a pretz prezan
		Qu’om del mon miels non tenc cort ab boban,
		Creyssen de pretz e d’onor tota via.
V		Qu entrels Lombartz ausi contar
		Quel Alaman el Bramanso
	35	El Roman, ses contrastar,
		Volon a lui la lectio
		De l’Emperi; e Milan e Pavia,
		Cremona et Ast e Ginoes an gran
		Cor quel bon Rey Castellan recebran
	40	A gran honor, si ven en Lombardia.
VI		E quil Papa pogues citar
		A major de se, fora bo,
		Quar del rey N’Anfos no vol far
		E del rey Carle bon perdo;
	45	E qu’om rendes N’Enric, qu’ora seria,
		E l’Emperi non estes pus vacan,
		E pueis, ab totz los reys que baptism’an,
		Anes venjar Jhesu Crist en Suria.
VII		Reis Castellas, vostra valor se tria
	50	Part las valors que tug l’autre rey an;
		E miels sabetz gardar home de ban
		Que venh’a vos, qu’autre reys qu’el mun sia.
VIII		Mon sirventes, Bernart, leu, ses fadia,
		En Castella portatz a Don Ferran;
	55	E digatz li ques tenh’ades denan
		Que es ni d’on, e fara bona via.