Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,060 Autor: Gaucelm Faidit Gènere: Canso Número: 11

 

Tot mi cuidei de chanssos far sofrir

I	1	Tot mi cuidei de chanssos far sofrir
		er en invern, tro la calenda maia ;
		mas ara vei qe no m’en dei giquir
		per ma razon que n’es plus coind’ e gaia
	5	e pel joi q’ai de mon Plus Avinen ;
		car vei son pretz q’ades poj’ et enanssa ;
		per q’ieu sai ben e conosc ses doptanssa
		q’en deu esser plus gaia ma chanssos
		sol car li platz que sos bels noms i fos.
II	10	Vas ma dompna soplei totas sazos
		qe-m nafret gen al cor, ses colp de lanssa,
		ab un esgart de sos hueills amoros,
		lo jorn qe-m det s’amor e sa coindanssa ;
		aquel esgartz m’intret tant dolsamen
	15	al cor, que tot lo-m reven e m’apaia ;
		e s’ab los huoills mi fetz cortesa plaia,
		ill m’en saup ben cortesamen garir
		per q’ieu lo-i dei conoisser e grazir.
III		Ja ma domna no-s cuich q’aillors me vir
	20	ni q’autr’ amors no-m destreigna ni m’aia,
		e, qand ieu plus autra dompna remir,
		ladoncs ai meins de talan, qe-m n’estraia —
		Per merce-ill prec, e per enseignamen,
		c’aia de mi cossirier e membranssa !
	25	car no la vei, no s’o teign’ a pesanssa,
		q’ieu n’estau tan pensius e cossiros
		q’ades i teing lo cor e-ls huoills amdos.
IV		Tant es bela e d’avinens faissos
		cela don chant, qe can m’en pren esmanssa,
	30	no vei domna ab mos ueils sumios
		que de beutat il posc’ aver eganssa,
		per que soi gais e n’ai mon cor jauzen
		[ e tant e mais que si-m donava Blaia ]
		can me perpes qe tan ric loc m’eschaia !
	35	e-n fatz soven mout angoissos sospir
		car non la posc totz jorns baisan jauzir.
V		En amor son fermat tuich miei cossir
		si q’en ren als non ai poder qe-ls traia
		q’ieu non fui anc faitz mas per far e dir
	40	midonz tot so qe-il sia bon e-il plaia ;
		a lieis m’autrei, e gen merces il ren,
		ab humil cor et ab humil semblanssa,
		e grazisc il lo joi e l’alegranssa
		qe-m det tan gen qe no-s romp ni-s descos
	45	per qe n’estau alegres e joios.
VI		Nuills hom non pot ses amor far que pros
		si non enten en joi et esperanssa
		que-l jois d’amor es tant fis e tant bos
		q’encontr’aicel non es mais benananssa ;
	50	que per amor ten hom son cors plus gen,
		e-n val hom mais, e-s n’effors e-s n’assaia
		d’aver bon pretz e de valor veraia,
		si-n vol hom miels cavalgar e garnir
		e conduchar e donar e servir.
VII (1)		A Santongier (Première version)
	55	En luec de me tramet ma chanso gaia,
		Linhaure, lai don ieu no-m puesc aizir,
		a-N Santongier per apprendr’ e per dir.
VII (2)		A Linhaure (Deuxième version)
		En loc d’amic tramet ma chanso gaia
		lai a Linhaur’, er qe no-m puesc aizir,
		anz cant un vers per aprendr’e per dir.
VIII		Senher Agout, a totz jorns vei venir
		vostre ric pretz e granar e florir.