Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 248,031 Autor: Guiraut Riquier Gènere: Canso Número: XXIV

 

Gauch ai, quar esper d’amor

I		Gauch ai, quar esper d’amor
		esser ricx e benanans;
		e mal, quar no suy bastans
		del tot a fin amador,
	5	que deu aver conoyssensa
		e lïaltat e saber;
		mas en tot ai bon esper
		que·m perduga bona fes
		e caritatz e merces.
II	10	Quar quaritatz e merces,
		bontatz ab plenier poder
		e savïeza valer
		m’en podon de selh on es
		tot; que·m don tal captenensa,
	15	elh, qu’anc res no fon enans,
		qu’ieu li sia fis amans
		esquivan tota folhor;
		qu’aitals hom tanh ad amor.
III		Aitals hom tanh ad amor
	20	que sapch’esquivar sos dans
		et enantir sos enans
		esperan reyal honor,
		servan sos bes que comensa
		ab esfortz de conquerer
	25	complimen d’onrat plazer,
		lai, on es gaugz e totz bes,
		on nos perduga merces.
IV		Lai nos perduga merces
		on res no pot dan tener;
	30	e selha que per dever
		a poder ab precx conques,
		don ses taca pres nayssensa
		le salvaires perdonans,
		pregue·l per paucx e per grans
	35	que·ns don temprada calor
		viven en la su’amor.
V		Quar no viu ben en amor
		hom, si non es agradans
		a la maire qu’es pregans
	40	so filh, nostre redemptor;
		quar pus non avem guerensa
		mas los sieus cars precx, per ver,
		ab que nos vol sostener,
		si· ns volem, tro·ns aja mes
	45	lai on es patz e merces.
VI		Donc gracïas e merces
		li·n rendam a mielhs parer
		tuch ab lauzor iorn e ser,
		si volem le gauch promes,
	50	qu’estiers no·y ajam plevensa;
		donc quascus, ab digz honrans,
		humils, ab faitz benestans,
		la maire del salvador
		honrem ab veray’amor.
VII	55	Verges, d’onor etz creyssensa
		al human linhatge grans,
		quar etz maires e pregans
		del filh de Dieu ab honor
		per nos: donc datz nos s’amor.