Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 156,010 Autor: Falquet de Romans Gènere: Chanson religieuse Número: XIV

 

Quan be me suy apessatz

I	1	Quan be me suy apessatz,
		tot l’als es nïens, mas Dieus:
	3	qu’om laissa·ls alocs e·ls fieus
		e totas las heretatz:
		ricors del segle malvatz
	6	non es mas trespassamens;
		per qu’om deu esser temens
		e leyals ses totz enians,
	9	quar quasqus es vïandans.
II		Qu’aitan tost cum hom es natz
		mou e vai coma romieus,
	12	a iornadas, et es grieus
		lo vïatges, so sapchatz;
		que quascus vay eslaissatz
	15	vas la mort; qu’aurs ni argens
		no l’en pot esser guirens,
		et on hom mais sai viu d’ans
	18	ses Dieu, mais fai de sos dans.
III		E tu, caitiu, que faras,
		qui conoysses mal e be?
	21	Fols yest si no t’en sove
		don yest vengutz ni on vas.
		S’en ta vida be no fas,
	24	tu mezeis t’es escarnitz:
		e si s’en part l’esperitz
		carguatz de peccatz mortals,
	27	ta mortz es perpetüals.
IV		Donc guarda cum obraras
		mentre vida te soste;
	30	qu’en breu d’ora s’esdeve
		que hom mor en un traspas,
		per qu’om non deu esser las
	33	de ben far quan n’es aizitz;
		qu’en breu de temps es falhitz
		lo ioys d’aquest segle fals:
	36	qu’a totz es mortz cominals.
V		Non i a frevol ni fort
		que tan sapcha d’escrimir
	39	qu’a la mort puesca guandir:
		qu’il non guard’agur ni sort,
		dreg ni mezura ni tort;
	42	qu’aissi tost pren lo melhor
		e·l plus bel co·l sordeior,
		e negus hom per nulh plag
	45	no·s pot gardar del sieu trag.
VI		Eu non sai mas un conort:
		qu’om pesse de Dieu servir
	48	e qu’om se guart de falhir
		mentre que vai vas la mort;
		qu’a passar nos er al port
	51	on tug passon ab dolor,
		li rey e l’emperador;
		e lai trob’om atrazag
	54	lo ben e·l mal qu’om a fag.
VII		A Dieu prec per sa dousor
		que nos fassa tan d’onor
	57	que·ns guar del mortal aguag
		tro son plazer ajam fag.