Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,052 Autor: Gaucelm Faidit Gènere: Canso Número: 41

 

Si anc nuills hom, per aver fin coratge 

I	1	Si anc nuills hom, per aver fin coratge
		ni per amar leialmen ses falsura,
		ni per sofrir franchamen son dampnatge,
		ac de sidonz nuill’ onrad’ aventura,
	5	ben degr’ eu aver
		alcun covinen plazer,
		qe-l ben e-l mal, cal q’ieu n’aia,
		sai sofrir, et ai saber
		de far tot qant midons plaia,
	10	si qe-l cor no-n puosc mover.
II		De fin’ amor sai segre-l dreich viatge,
		si que tant am mi donz outra mesura
		qe far en pot tot qant l’es d’agradatge ;
		qu’eu no-ill deman, tan tem dir forfaitura,
	15	baisar ni jazer —
		pero si sai tant valer
		ad ops d’amar, qui q’en braia,
		c’onrat jorn e plazen ser
		et tot so c’a drut s’eschaia
	20	aus desirar e voler.
III		Si tot lo vuoill, ieu non ai autre gatge,
		don ni autrei ni paraula segura…
		mas ill es tant franch’ e de bel estatge
		que la valors e-l pretz, c’a lieis s’atura
	25	fai a totz parer
		c’Amors i aia poder,
		qe lai on es valors gaia
		deuria merces caber —
		vec vos tot so qe-m n’apaia
	30	e-m tol, qe no-m desesper.
IV		Mas e que-m val ? qu’ieu non ai vassalatge
		ni ardimen don l’aus dir ma rancura ;
		qe tan dopte s’onor e son paratge,
		son gai joven e sa bella faitura,
	35	qu’aisso-m fai temer
		qu’a leis non deigna caler
		de mal ni d’afan qu’ieu traia ;
		e si-m volgues retener
		no volgr’ esser reis de Maia,
	40	tan cum ab lieis remaner !
V		Auzit ai dir, de savi ses follatge,
		q’om ora mal celui don non a cura,
		e ditz que-l don Dieus jove seignoratge —
		aqest oratz sia tortz o drechura,
	45	ai d’amor per ver,
		e, si l’ai, no-m pot doler ;
		que, de pro dompna veraia,
		val mais c’om ric dan esper
		qu’aia don d’avol savaia
	50	qu’om non deu en grat tener.
VI		Q’ieu-n sai una q’es de tant franc usatge
		c’anc non gardet honor sotz sa centura —
		sieus es lo tortz s’ieu en dic vilanatge ! —
		qe, senes geing e senes cobertura,
	55	fai a totz vezer
		cum poing en se deschazer —
		E dompna q’ab tans s’essaia
		non cuich ja qe m’alezer,
		que ja de lieis ben retraia,
	60	ni-m vuoill qe-m deia eschazer.
VII		Na Maria, dompna gaia,
		vos non etz de tal saber,
		car non faitz ren que desplaia,
		anz plai tot e deu plazer.