Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,032 Autor: Gaucelm Faidit Gènere: Canso Número: 42

 

Lo gens cors honratz

I	1	Lo gens cors honratz,
		complitz de grans beutatz,
		de lieis que plus m’agenssa
		e qe mais mi platz,
	5	on es plazens solatz
		e franch’ humilitatz,
		e doussa captenenssa,
		e gais pretz prezatz,
		mi fai chantar soven,
	10	ses so qu’il non consen
		q’ieu ja-n sia jauzire
		d’aver joi plazen ;
		ni de lieis non aten
		mas l’envej’ e-l desire
	15	q’ai del sieu cors gen,
		ses autre jauzimen.
II		Per aisso li-m ren
		a far son mandamen ;
		e si-s vol, pot m’aucire,
	20	q’ieu no li-m defen ;
		pero be m’es parven
		que fos plus avinen,
		car li sui francs sofrire
		e l’am finamen,
	25	que fos sa voluntatz
		qe-il plagues m’amistatz,
		si c’ab doussa parvenssa
		m’en fos jois donatz,
		anz que fos car compratz ;
	30	q’enaissi, ses faillenssa,
		fora-l dos e-l gratz
		en cent dobles doblatz.
III		E pois auziratz
		gais sons enamoratz,
	35	de fina benvolenssa,
		si-n fos gent pagatz ;
		mas, pels vilans baratz
		dels fals prejadors fatz,
		vei metr’ en mescrezenssa
	40	e mal encolpatz
		cels q’amon francamen !
		per q’eu prec doussamen
		midonz, cui sui servire,
		d’amar leialmen —
	45	c’autrui galiamen
		en dampnatge no-m vire,
		q’a dreig jutjamen
		er tortz si mal m’en pren.
IV		D’autre faillimen,
	50	reignon vilanamen
		dompnas, per q’ie-m n’azire
		e las en repren,
		qe, s’una a drut valen
		adreich ni conoissen
	55	don puosc’ om gran ben dire,
		greu er longamen
		car tengutz ni amatz ;
		mas us mal enseignatz,
		ab gran desconoissensa,
	60	er seigner clamatz !
		q’ie-n sai de rics malvatz,
		senes tota valensa,
		en aut loc pojatz,
		e maniers e privatz.
V	65	Tant n’es pretz baissatz
		q’ie-n fora plus iratz,
		mas per lieis n’ai tenensa
		e-m tenc afrenatz
		a cui non plai foudatz,
	70	ni faitz desmesuratz,
		ni malvaz’ entendenssa,
		ni avols percatz.
		Tant val, q’ie-m n’espaven
		e n’ai meins d’ardimen
	75	per lieis, qan be-m cossire
		son afortimen ;
		si merces no-i dissen,
		pro ai de que sospire,
		q’en als no-m n’enten
	80	ni ai lo cor ni-l sen.
VI		Per qu’ad escien
		cobri mon marrimen
		e sai de mon dan rire
		amorosamen ;
	85	e, s’agues cor jauzen,
		saubra-l celadamen
		grazir et escondire
		q’en luoc, per un cen,
		val gen mentirs assatz
	90	mais qe folla vertatz,
		e mais genta suffrensa
		c’orguoills eslaissatz ;
		q’ieu n’ai vist, so sapchatz,
		venir mainta eschasenssa
	95	de rics dos honratz
		per gen sofrir en patz.
VII		Dompn’ab finas beutatz,
		pros e de gran valensa,
		Na Maria, gratz
	100	vos es tals dos donatz
		que, segon ma crezenssa,
		vos vei acordatz
		totz, los pros e-ls malvatz.
VIII		Dels bels digz honratz
	105	e-l bens dirs es vertatz.