Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,022 Autor: Gaucelm Faidit Gènere: Planh Número: 50

 

Fortz chausa es que tot lo major dan

I	1	Fortz chausa es que tot lo major dan
		e-l major dol, las ! q’ieu anc mais agues,
		e so don dei totztemps plaigner ploran,
		m’aven a dir en chantan, e retraire —
	5	Car cel q’era de valor caps e paire,
		lo rics valens Richartz, reis dels Engles,
		es mortz — Ai Dieus ! cals perd’ e cals dans es !
		cant estrains motz, e cant greus ad auzir !
		Ben a dur cor totz hom q’o pot sofrir…
II	10	Mortz es lo reis, e son passat mil an
		c’anc tant pros hom non fo, ni no-l vi res,
		ni mais non er nulls hom del sieu semblan,
		tant larcs, tant rics, tant arditz, tals donaire,
		q’Alixandres, lo reis qui venquet Daire,
	15	non cre que tant dones ni tant meses ;
		ni anc Karles ni Artus plus valgues,
		c’a tot lo mon si fetz, qui-n vol ver dir,
		als us doptar et als autres grazir.
III		Meravill me del fals segle truan,
	20	co-i pot estar savis hom ni cortes,
		puois re no-i val beill dich ni faich prezan,
		e doncs per que s’esfors om, pauc, ni gaire ?
		q’eras nos a mostrat Mortz que pot faire,
		q’a un sol colp a-l meillor del mon pres,
	25	tota l’onor, totz los gaugs, totz los bes ;
		e pos vezem que res no-i pot gandir,
		ben deuri’ hom meins doptar a morir !
IV		Ai ! valens reis seigner, e que faran
		oimais armas ni fort tornei espes,
	30	ni richas cortz ni beill don aut e gran,
		pois vos no-i etz, qui n’eratz capdelaire,
		ni que faran li liurat a maltraire,
		cill que s’eran en vostre servir mes,
		c’atendion que-l guizerdos vengues ;
	35	ni que faran cill, qe-is degran aucir,
		c’aviatz faitz en grand ricor venir ?
V		Longa ira et avol vid’ auran,
		e totztemps dol, q’enaissi lor es pres ;
		e Sarrazin, Turc, Paian e Persan,
	40	qe-us doptavon mais c’ome nat de maire,
		creisseran tant en orguoil lor afaire,
		qe-l Sepulcres n’er trop plus tart conques —
		Mas Dieus o vol ; que, s’el non o volgues,
		e vos, seigner, visquessetz, ses faillir,
	45	de Suria los avengr’ a fugir.
VI		Oimais no-i a esperanssa qe-i an
		reis ni princeps que cobrar lo saubes !
		Pero, tuich cill qu’en luoc de vos seran
		devon gardar cum fotz de pretz amaire,
	50	ni cal foron vostre dui valen fraire,
		lo Joves Reis e-l cortes Coms Jaufres ;
		et qui en luoc remanra, de vos tres
		ben deu aver aut cor e ferm cossir
		de far bos faitz e de socors chausir.
VII	55	Ai ! Seigner Dieus ! vos q’etz vers perdonaire,
		vers Dieus, vers hom, vera vida, merces !
		Perdonatz li, que ops e cocha l’es,
		e no gardetz, Seigner, al sieu faillir,
		e membre vos cum vos anet servir !