Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 106,001 Autor: Cadenet Gènere: Canso Número: 73

 

Ab leyal cor et ab humil talan

I	1	Ab leyal cor et ab humil talan,
		venc vas Amor per mostrar mos greus mals
		qu’ieu ai sufertz, grans e descominals,
		per lo dous vis e l’amoros semblan
	5	que-m fes midons, al prim esguardamen,
		quan pres mon cor e mon fin pessamen,
		e suy mi mes elh sieu ric senhoratge.
II		A vos, Amors, vuelh mostrar en chantan
		co-m pres midons ni per que ni an quals,
	10	ni on me mes, sos hom fis e leyals—
		ab pauc de be suy pres e malanan,
		on m’a tengut, senes tot chauzimen,
		non sol un an, ans crezatz certamen
		seran complit set ans al prim erbatge.
III	15	Tot suavet Amor mi venc denan
		mostran els huelhs guays semblans e cabals
		et ab merce — quar non es hom carnals
		que ja pogues desviar mon talan —
		per lo sieu ris que-m fes tan doussamen,
	20	que-m fon avis merce m’agues breumen,
		car m’o cugiei, conosc que fis folhatge.
IV		Qu’ieu la triey, segon lo mieu semblan,
		per la melhor de las autras reyals —
		et a tengut mon cors en sos ostals
	25	ab son ric pretz sobre-ls autres prezan ;
		si co-l solelhs sobr’ autr’ alumnamen
		nos ren clardat, be-n puesc dir eyssamen,
		qu’ilh es clardatz de tot enlumenatge.
V		Lo dous cossir del belh cors benestan
	30	agreuja mout mas dolors e mos mals,
		que de plorar rendon mos huelhs venals,
		per sa beutat que m’es totjorn denan ;
		que per semblan la vei en pessamen,
		per que conosc qu’aucir m’a planamen,
	35	si-n breu vas me non domda son coratge.
VI		E doncs, Amors, fessetz per me aitan,
		qu’en ben voler siatz ab me eguals :
		que-m destrenhatz midons d’aitan sivals
		que-l sapcha bon e m’en fassa semblan,
	40	quar ieu l’am mais de nulha ren viven,
		et auretz mi fag algr’ e jauzen
		qan ieu de lieys aurai pres senhoratge.
VII		A mon Dezir t’en vai, chanson, breumen
		e di-l, s’il play, que per son chauzimen,
	45	li sapcha bo que ieu l’am, d’agradatge.