Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 248,007 Autor: Guiraut Riquier Gènere: Canso Número: XXII

 

Ajssi quon es sobronrada

I		Ajssi quon es sobronrada
		la maire del salvador,
		deu esser honran lauzada;
		quar singulars de valor
	5	fo et es,
		de totz bes
		complida,
		claus de vera vida,
		grazida.
	10	E donc sobiras devers
		m’es que s’esfors mos sabers
		tant que·l sia d’agradatge
		sos laus que tenc en coratge,
		qu’ab sobrevoler comensa.
II	15	Regina verge, clamada
		devetz esser ab lauzor,
		e temsuda et amada;
		quar Dieus vos fe tant d’onor
		quant se mes
	20	e vos —pres
		perida
		gens port de gandida,
		chauzida
		flors— e nasc de vos hom vers,
	25	vers Dieus, on es mos espers;
		donc be·us det gran avantatge,
		qu’anc no fon d’uman linhatge
		tro que de vos pres nayssensa.
III		Tota flors don frutz s’aizina
	30	pert apres son frug beutat;
		vos remazes fresqu’e fina
		verges creyssens de rictat:
		pus olens,
		pus plazens,
	35	pus clara
		flors etz qu’el mon para
		e guara;
		flors de tot frug saboros,
		flors de gaug, redemptïos
	40	etz del mon; quar lo salvaire
		fon fils de vos, vostre paire,
		don etz sa mair’e sa filla.
IV		De paradis etz regina,
		maire Dieu, per gran bontat;
	45	et etz restaurans mezina,
		fons de vera pïetat;
		als fallens
		etz guirens
		d’amara
	50	mort; quar vostra cara
		esguara
		pregan lo rey glorïos
		qu’es paires e filhs de vos,
		filla del vostre filh, maire
	55	del vostre paire: com faire
		so·s poc es grans meravilla.
V		Pero ma fes no·s balansa;
		quar Dieus per nos restaurar
		o fe, que pot ses erransa
	60	far mil tans qe hom pessar,
		e·l poder
		ab voler
		capdelha;
		donc, maire piucella
	65	mout bella,
		creyssensa prezes d’aon:
		qu’elh, qu’es mais de tot lo mon,
		caup en vos, verges certana,
		e visc e·n pres carn humana
	70	e·n nasc senes tota taca.
VI		Enquer vos fa mais d’onransa,
		que·us obezis, don’e·us par:
		per que·us prec aiatz membransa
		que·l denhetz per mi pregar;
	75	qu’ab lezer
		iorn e ser
		apella
		m’arma e gragella,
		sembella
	80	us greus peccatz que· m cofon;
		e vos podetz m’en far mon.
		Si·l vostre filh, sobirana
		maire, ·n pregatz, tost er sana
		m’arma que de mort se raca.
VII	85	Dona, estela del mon
		ab clardat que no·s rescon
		es per nos, gent crestïana:
		donc preguatz Dieu que de vana
		vida nos gar e de braca.