Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Bibliografia
* Testimonis
* Aparat crític
* Notes
* Traduccions

 

Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,003 Autor: Gaucelm Faidit Gènere: Canso Número: 70

 

Ab nou cor et ab novel so

I 1
Ab nou cor et ab novel so,
    voill un nou sirventes bastir
    e pel douz temps que vei venir
    e per la cuindeta sazo ;
  5 e car Amors ab joi me lia
    no-i dei far de joi carestia,
    car rix ditz hom que sui, e que ben ai,
    c’Amors mi te cuind’ e cortes e gai.
     
II  
Gais sui eu plus qu’anc hom no fo
  10 car cella qu’el mond plus desir
    fai mon gang entier reverdir ; 
    e can remire sa faisso
    ni-m membra-l joi qu’ab leis avia,
    naissen orgoills e gaillardia ;
  15 e car ancse aug dir qu’orgoillz dechai,
    no m’aus pensar nuill otracuidat plai.
     
III  
Plus pens ieu cal que mal o bo
    don m’ave, ses viur’ e morir ;
    et es trop leu de devidir
  20 cal sobra, del dan o del pro,
    cant ieu n’ai zo que plus volia
    perdut, lai on mielz o avia…
    Del perdr’ ac dol, e de tan querre, jai ;
    Chauzetz, seignors, si viure o morr’ ai.
     
IV 25
Morai, car be ve de raiso
    si, per amar ni per servir
    deu domna son amic aucir,
    qu’aucia mi, e dire-us zo
    Totz temps fis zo qu’a leis plaisia :
  30 per zo la pert, mas s’ieu disia :
    « sobre servir me tol mon joi verai »,
    e la domna non perdre hogan m’ai.
     
V  
Ja Dieus no-l gar ni be no-ill do,
    cui per amar ni per servir
  35 per hondrar ni per obezir
    fai vas son amic traïcio ;
    traïcio fa, pos lo galia ;
    galiat l’a, poz lo cambia,
    si com ieu fu ; ja plus no-us en dirai ;
  40 s’ill es folla, ja eu non o serai.
     
VI  
Domna-l major tort que-us tenia,
    es can volontiers vos servia,
    e car am vos, amei ab cor verai,
    et eissemenz lo major tort qu’ie-us ai.
     
VII 45
Domna, de doz caps se-ills avia, 
    per dol de vos l’un trenzaria,
    e pois vos perd e nuill valer no-us ai,
    no-n ai mas un, ja no-l m’en toarai.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI