Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 220,001 Autor: Guilhem d'Ieiras Gènere: Chanson religieuse Número: XIX

 

A Dieu, cuy es totz poders

I		A Dieu, cuy es totz poders,
		dreitz e so[b]iras sabers
		e iusts [e] certas volers,
		mi [re]n cofes, encolpatz:
	5	[f]i totz greus peccatz, [fallitz],
		pessans, en faitz et en digz;
		per que·l prec fass’als delitz
		merces, que mais n’a perdona[tz].
II		En vos es totz mos espers,
	10	[se]nher dreyturiers e vers,
		que·[m] soudetz totz mos dolers
		don [so] tan greumen dampnatz,
		de[ls] tortz mos latz envazitz,
		de p[ec]catz mortals feritz;
	15	senher d[e] totz bes complitz,
		valha·m vostr’humilitatz.
III		Tan son greu mey falhimen
		qu’ai faitz tot iorn longamen,
		per que·m do gran espaven,
	20	senher, si no·m conortatz;
		que Longis, fers, fels e fortz
		aculhi·s ab ferms conortz
		e queric perdo dels tortz
		a vos, per cuy fos nafratz.
IV	25	Per qu’ie·us requier humilmen
		—si tot suy fallitz greumen—
		que·m perdonetz eyssamen,
		que mestiers m’es qu’o fassatz;
		que, quan passarai los portz,
	30	vos mi donetz bonas sortz,
		qu’ieu sia del tot estortz
		e per vos quitis clamatz.
V		Reys, senher omnipotens,
		vers Dieus e vers salvamens:
	35	merce vos quier humilhmens,
		que· m perdonetz, s’a vos platz;
		que per so sai fos trames
		del cel, que perdonesses
		a selhs que·us clamon merces,
	40	qu’aitals poders vos es datz.
VI		Verges, regina plazens
		sobre valor plus valens,
		pregua ton filh coralmens
		per mi, que trop suy forfatz;
	45	mas, on mager forfatz es,
		mager pot esser merces;
		quar si forfatz no·s fezes,
		ia perdos no fora datz.
VII		Verays Dieus e verais bes,
	50	verays dreigz, vera merces:
		a vos mi ren [com qui s’es
		en] vostras mas comandatz.