Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 206,001 Autor: Guilhem d'Autpol Gènere: Alba religieuse Número: XVIII

 

Esperansa de totz ferms esperans

I		Esperansa de totz ferms esperans,
		flums de plazers, fons de vera merce,
		cambra de Dieu, ortz don naysso tug be,
		repaus ses fi, capdels d’orfes enfans,
	5	cossolansa dels fis descossolatz,
		frugz d’entier ioy, seguransa de patz,
		portz ses peril, porta de salvan port,
		gaug ses tristor, flors de vida ses mort,
		maire de Dieu, dona del fermamen,
	10	soiorns d’amicx, fis delietz ses turmen,
		de paradis lums e clardatz et alba.
II		Glorïoza, tant es la ioya grans
		que·us venc de selh que·l mon capdelh’e te,
		que vos lauzan no pot hom dir mas be,
	15	si totz lo mons n’era tostemps lauzans;
		quar en vos son totas plazens bontatz,
		gaugz et honors, salutz e caritatz;
		verdiers d’amor, qu’el tieu pressïos ort
		dissendet frugz que destruys nostra mort,
	20	verga seca fazen frug ses semen,
		porta del cel, via de salvamen,
		de totz fizels lums e clardatz et alba.
III		Plazens dompna, qu’en vos a plazers tans
		que totz lo mons no· n diria· l mile,
	25	glorïosa, pus que tant as de be,
		membre·t de me e de totz tos clamans;
		que·l tieus gens cors fon per nostr’ops creatz.
		Cors gracïos, ples de totas beutatz,
		pus que ses te non puesc trobar cofort,
	30	perduy me lay on es vida ses mort,
		pres del tieu filh que m’a fach de nïen,
		si qu’ieu veya·l sieu gay captenemen
		lay on no falh lums ni clardatz ni alba.
IV		A, quon seran iauzens e benanans
	35	tug vostr’amic d’entier ioy per iasse!
		E pus Dieus vol qu’en vos sion tug be,
		glorïosa, siatz de mi membrans;
		e si tot s’es grans vostra sanctitatz,
		no m’oblidetz, dompna, per mos peccatz,
	40	qu’ayssi quon son mey falhimen pus fort,
		m’es maiers ops que·m desliuretz de mort;
		e quar de vos auta merce n’aten,
		merce m’ajatz per vostre chauzimen,
		que mi sïatz lums e clardatz et alba.
V	45	Qu’ieu falhitz, fals mi sent, greus e pezans
		per mos fols faitz, et ai razon de que;
		quar gran so·l mal qu’ay faitz, e pauc li be,
		e·lh dich tafur; per qu’ieu suy merceyans
		que·m razonetz, plazens dompna, si·us platz,
	50	lay on sera·n dregz iutjaments donatz;
		que no·y valran plag ni agur ni sort,
		ans aura quecx per se paor de mort ;
		vos me mostratz al iorn del iutjamen
		vostre car filh ab cara resplanden,
	55	que·m don ab ioy lum e clardat et alba.
VI		Poderos Dieus, verays e merceyans,
		merce m’ajatz; qu’ieu vos azor e·us cre
		e·us ren lauzor de l’honor e del be,
		que m’avetz fag temps, iorns e mes et ans.
	60	Dieus Paire, Filhs Salvair’e Cristz nomnatz,
		Sayns Esperitz e vera trinitatz:
		als peccadors donatz vi’e conort
		co·s desliuron dels lïams de la mort ,
		e·ls faitz venir al veray iauzimen
	65	on seran fait maynt glorïos prezen,
		lay on estan iorns e clardatz et alba.
VII		Lo sons mortals estenh la folla gen;
		leu si qui dorm mentre qu’a merce pren
		Dieus peccadors! Que·l iorns ven apres l’alba.
VIII	70	Vida don Dieus ab ioy ses marrimen
		em paradis ab tot lo sieu coven
		a totz ayssels que diran aquest’alba.