Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Codi: 434a,022 Autor: Serveri de Girona Gènere: Sirventes Número: 11

 

Entrels reys e·ls baros

I	1	Entrels reys e·ls baros
		Soy soven demandatz
		Per que tant ay celatz
		Mos vers e mas chanços,
	5	Ez eu respont c'una gentils suzaus,
		Franca de cor e plasenz a vezer
		Los volc tener     Dins una ferma clau.
II		Car pus reçeubutz fos
		Gen mos chans e presatz
	10	Per leys, cuy era datz,
		Be·m mandava razos
		C'a mi plages, si tot s'estav'enclaus,
		Pus il l'agues e·n fezes son plazer,
		Mandan temer     Calan estar suzau.
III	15	E can n'ac vint e dos
		En lonc temps amassatz,
		Fuy gen per leys mandatz
		E dis qu'era sazos.
		De dir mos chans, e can tan dire n'aus,
	20	Clam li merce no n'aya desplazer ;
		C'amanz per ver,     Sidons nomnan s'esjau.
IV		Mans juns, de genoyllos
		Li demandey cutchatz,
		Per que·ls ac aturatz,
	25	E simplamen respos:
		Be n'as razo, car chantan gen t'esjaus,
		Pus eu esmer ez aprim ton saber
		E·l reys aver     Lo vol e·l lauz'e l'au.
V		Si tant es temeros
	30	Con pars enamoratz,
		Enjans e falsetatz
		T'es luyn ; car amoros
		Ses leyaltat fa blasme de sos laus
		E fals parlans no pot en be caber
	35	Ne·s fay querer     Mas d'un vil pe de pau ! »
VI		Domn'ab plasenz faiços,
		On pretz creys e beutatz,
		Prezada pels presatz,
		Gran merce ren a vos.
	40	Dels vostres ditz plasenz viu e repaus
		Vos remiran, e car deynatz voler
		C'omils esper     Vos, c'am e prec e lau.
VII		Na Sobrepretz, mays desir vos vezer
		Ses plus c'aver     De tot lo mon la clau !
	45	La domn'als Cartz e·l reys mi fan plaser ;
		Car fan dever,     En quant hom ve ez au.