Wolf, George; Rosenstein, Roy. The Poetry of Cercamon and Jaufre Rudel. New York & London: Garland Publishing, Inc, 1983

[CdT en procés d'incorporació]

Codi: 262,004 Autor: Jaufre Rudel de Blaja Gènere: Vers Número: 1

 

Pro ai del chan essenhadors

I	1	Pro ai del chan essenhadors
		entorn mi, et ensenhairitz,
		—pratz e vergiers, albres e flors,
		voutas d’auzelhs e lays e critz—,
	5	per lo dous termini suau,
		qu’en un petit de joy m’estau,
		don nulhs deportz no·m pot jauzir
		tan cum solatz d’amor valen.
II		Las pimpas sian als pastors,
	10	et als enfans bordeitz petitz,
		e mias sion tals amors
		don ieu sia jauzens jauzitz !
		Qu’ieu la sai bona tot aitau
		ves son amic en greu loguau ;
	15	per so·m sen trop soen marrir
		quar non ai so qu’al cor n’aten.
III		Luenh es lo castelhs e la tors
		ont elha jay e sos maritz,
		e si per bos cosselhadors
	20	cosselhan no suy enantitz—
		qu’autre cosselhs petit m’en vau,
		aitan n’ay fin talan corau—
		alrea no·y a mais del murir,
		s’alqun joy no·n ai en breumen.
IV	25	Totz los vezis apel senhors
		del renh on sos joys fo noyritz,
		e crey que·m sia grans honors,
		quar ieu dels plus envilanitz
		cug que sion cortes leyau;
	30	ves l’amor qu’ins el cor m’enclau
		ai bon talant e bon albir,
		e say qu’ilh n’a bon escien.
V		Lai es mos cors, si totz c’aillors
		non a ni sima ni raïtz,
	35	et en dormen sotz cobertors
		es lai ab lieis mos esperitz;
		e s’amor mi revert a mal,
		car ieu l’am tant e liei non cal;
		tost veirai ieu si per sufrir
	40	n’atendrai mon bon jauzimen.
VI		Ma voluntat[z] s’en vay lo cors
		la nueit e·l dia esclarzitz
		laïntz per talant de socors,
		mas tart mi ve e tart mi ditz:
	45	“Amicx,” fa·s elha, “gilos brau
		an comensat tal batestau
		que sera greus a departir
		tro qu’ abduy en siam jauzen.”
VII		Per so m’en creis plus ma dolors,
	50	car ieu au lieis en luec[s] aizit[z],
		que tan no fauc sospirs e plors
		que sol baizar per escarit[z]
		lo cor no·m tengues san e sau ;
		bon'es l’amors, e molt per vau,
	55	e d’aquest mal mi pot guerir
		ses gart de metge sapien.