Wolf, George; Rosenstein, Roy. The Poetry of Cercamon and Jaufre Rudel. New York & London: Garland Publishing, Inc, 1983

[CdT en procés d'incorporació]

Codi: 262,006 Autor: Jaufre Rudel de Blaja Gènere: Vers Número: 5

 

Quan lo rossinhols el follos

I	1	Quan lo rossinhols el follos
		dona d’amor e·n quier e·n pren,
		e mou son chant jauzent joyos,
		e remira sa par soven,
	5	e·l riu son clar e·l prat son gen,
		pel novel deport que·y renha,
		mi ven al cor grans joys jazer.
II		D’un’amistat suy enveyos—
		quar no sai joya plus valen—
	10	c’or e dezir, que bona·m fos
		si·m fazia d’amor prezen;
		que·l cors a gras, delgat e gen,
		e ses ren que·y descovenha,
		e s’amors bon’ab bon saber.
III	15	D’aquest’amor suy cossiros
		vellan e pueys sompnhan dormen,
		quar lai ay joy meravelos
		per qu’ieu la jau joyos, jauzen;
		mas sa beutatz no·m val nien,
	20	quar nulhs amicx no m’essenha
		cum ieu ja n’aya bon saber.
IV		D’aquest’amor suy tan cochos
		que quant ieu vau ves lieys corren,
		vejaire m’es qu’a reüsos
	25	m’en torn e que lay·s n’an fugen;
		e mos cavals y cor tan len ­…
		a greu cug mais que·y atenha,
		s’amors no la·m fay remaner.
V		Amors, alegres part de vos,
	30	per so quar vau mo mielhs queren;
		e suy en tant aventuros
		qu’enqueras n’ay mon cor jauzen,
		la merce de mon Bon Guiren
		que·m vol e m’apell’e·m denha,
	35	e m’a tornat en bon esper.
VI		E qui sai rema deleytos
		e Dieu non siec en Bethleem,
		no sai cum ja mais sia pros,
		ni cum ja venh’a guerimen;
	40	qu’ieu sai e cre, mon escien,
		que selh qui Jhesus ensenha
		segur'escola pot tener.

 

que quant ieu vau ves lieys corren,