Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 248,073 Autor: Guiraut Riquier Gènere: Canso Número: XXXIII

 

Sancta verges, maires pura

I		Sancta verges, maires pura
		de Ihesucrist filh de Dieu,
		per vertut, non per natura,
		del sant poder plenier sieu;
	5	elegida, saludada
		del angil, humils trobada,
		venc en tu Santz Esperitz,
		Filhs, Paires, Dieus-hom, per traire
		nos de perilhos dezaire:
	10	prega·l qu’elh nos sia guitz.
II		Per ta gran bonaventura
		fon passatz lo mans de Dieu:
		quar per atemprar drechura
		te fes maire del filh sieu,
	15	e per tu es sobronrada
		tota l’umanals linhada;
		quar tos precx es essauzitz,
		dona sancta, filha maire,
		prega ton filh e ton paire
	20	que·ns fassa sos elegitz.
III		De totz bes agram frachura
		ses tu que nos vals ab Dieu,
		dona, quar per forfachura
		esperan lo poder sieu
	25	peneden. Verges lauzada,
		yest nueg e iorn avocada
		de peccadors convertitz,
		e deus nos totz bes atraire;
		no·t devem per que retraire,
	30	quar de mort nos as ganditz.