Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Aparat crític
* Traduccions
* Imatges

 

Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Codi: 155,002 Autor: Folquet de Marseilla Gènere: Canso Número: XX

 

A pauc de chantar no·m recre

I 1 A pauc de chantar no-m recre
    per enueg dels lauzenjadors,
    mas forssa d’Amor m’en rete
    que no·m laissa virar alhors :
  5 tant sui dels benamans la flors ;
                aissi·m te
            Amors pres e·l fre
    que de nulh alre no·m sove
    mas de lieis servir a jornal :
  10 u’aissi·m pes qu’o fasso·l lial.
     
II   Doncs sui ben folhs quar no·m refre
    d’amar lieis que be·m par folhors,
    pus qu’autre bes no·m n’esdeve
    ans vey qu’ades creys ma dolors,
  15 qu’en mi sol a fag tot son cors ;
                per ma fe
            [vos dic] mielhs m’ave
    que per lieis sofieira jasse
    mon dan, si tot a lieis no·n cal,
  20 qu’autra·m des s’amor per cabal.
     
III   E doncs, s’ieu fas so que·s cove,
    be m’en deu eschazer honors,
    quar qui pot amar mielhs de be
    per dreg l’en eschai la lauzors ;
  25 e sap be midons et Amors
                qu’ieu en re
            vas lieis no·m malme
    mas car li clam, humils, merce
    que·m des so que m’es plus coral :
  30 pot esser qu’ilh so teng’ a mal ?
     
IV   E quan mi paraula ni·m ve,
    mi salh al cor la resplandors
    dels bels huelhs, e del douz ale
    mi ven mesclamens la sabors,
  35 si qu’en la boca·m nais doussors,
                per qu’ieu cre
            e conosc que·l be
    qu’ieu dic de lieys non ai de me,
    ans m’ieis de s’amor natural
  40 que m’a ins e·l cor pres ostal.
     
V   E pus aquest jois mi mante,
    si·m fezes aitant de socors
    que·m denhes retener ab se,
    guardatz s’ieu fora dels aussors !
  45 que sos ricx pretz e sa valors
                mi reve
            del tot e·m soste,
    e sol qu’ilh agues lo mile
    de la dolor fer’ e mortal,
  50 nos agram partit per egual.
     
VI   Pero si·l clamarai merce
    del dan qu’ilh me fai e del mal,
    pus vey qu’autr’ amor no mi val.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI