Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 248,069 Autor: Guiraut Riquier Gènere: Vers Número: XXXI

 

Qui·s tolgues

I	1	Qui·s tolgues
		e·s tengues
	3	dels mals en que cossen,
		e fezes
		totz los bes
	6	que conoys et enten,
		res non es
		que nogues
	9	d’anar a salvamen
		als repres
		on la fes
	12	es de Dieu, que·ns aten
		qu’a bon port nos traisses
		sa merce prometen.
II	15	Prometen
		don valen
		trobam Dieu tan cortes,
	18	que fazen
		e dizen
		so que crezem que·l pes,
	21	que·ns defen
		a prezen;
		e sos mans no faym ges!
	24	No·ns carven,
		ans sufren
		espera que·ns agues
	27	penedens, humilmen,
		quar nos fe e·ns conques.
III		Be·ns conques,
	30	quar mort pres
		per son poble dolen,
		que vengues,
	33	si·s volgues,
		a luy, sals, peneden;
		que·l paires
	36	premiers fes
		Adams un falhimen,
		don fon mes
	39	sos heres
		en yssilh mot cozen,
		tro que Dieus sa trames
	42	qui·ns rezemes moren.
IV		Mas moren,
		mal viven,
	45	cazem totz iorns el bres,
		en que·ns pren
		desceben
	48	l’enemicx de mals ples
		que·ns apren
		e·ns essen
	51	a son vol, de ben des,
		don tot len
		al arden
	54	fuec nos mena espes;
		e selh que li conten
		es en Dieu ben apres.
V	57	Ben apres
		es, que res
		no·l falh, sel que·l desmen;
	60	quar sotzmes
		demanes
		es l’enemicx ses sen
	63	qu’a perpres
		totz mals ves,
		per que fug mantenen
	66	quan sos pes
		es entes
		e tengutz a nïen,
	69	e crey que Dieus endres
		aquelh afortimen.
VI		Quar mals es
	72	tant apres,
		volgutz, faitz per la gen,
		e tan pauc amatz bes,
	75	nos ten Dieus en turmen.