Frank, István. Pons de la Guardia, troubadour catalan du XIIe siècle. "Boletín de la Real Academia de Buenas Letras de Barcelona", 22 (1949), pp. 229-327.

Codi: 377,003 Autor: Pons de la Garda Gènere: Canso Número: IV

 

Faray chanzo ans que veinha·l laig tems

I		Faray chanzo ans que veinha·l laig tems,
		pus en Tolsa nos n'anam tuit essems.
		A Deu coman tot cant reman de zay :
		ploran m'en part, car las domnas am nems.
	5	Tot lo païs, de Salsas tro a Trems,
		salv Deus, e plus cel on midon estai.
II		Tot n'o am mais car ma dona i sai ;
		qu'el' es mos jois et el' es tot cant ai,
		e res no·m am mas leys cui amar suel
	10	ni de mos jorns autra non amarai ;
		e sai e cre que leis aman morai,
		pus a leis platz qu'enaixi m'o acuill.
III		Cant a leis plaitz que·m fay tort ni orguil,
		sitot m'o vey, conoixer non o vul.
	15	Mas ben conosc tot cant me fai de be :
		lo be·l graesc e·l mal, sitot m'en duil.
		C’om peitz me fai, can m'esgaran sey oil,
		ai tant de yoy que del mal no·m sove.
IV		Non es nuils joys lo desir que m'en ve,
	20	que si·m destreinh, non ay poder de me,
		mas sol d'aitan cant tot soletz m'estau
		e pes de leis ab lo cor que la ve :
		aquel douz pes me sojorn' e·m reve
		et ai n'aüt pessan mant bon jornau.
V	25	Domna, vos etz manenta de bon lau
		e, ses mentir, la gencer c'om mentau ;
		per qu'eu sofer totz mos mals e deport
		que trac per vos soletz e[n] mon cabau,
		e n'ai dolor, mas vos estatz süau :
	30	d'aizo m'es vis que faitz alques de tort.
VI		Us lausengiers me vol far peitz de mort ;
		mas no m'en clam, que mout n'ai bon conort
		e no·y ay dan, et il fai que vilans.
		Ja non s'en lais, que pesaria·m fort :
	35	qu'este[r]s son grat auray joy e deport
		merces midons, a cui baissei las mans.