Linskill, Joseph. The Poems of The Troubadour Raimbaut de Vaqueiras. The Hague: Mouton & Co

Codi: 392,024 Autor: Raimbaut de Vaqueiras Gènere: Canso-sirventes Número: XXII

 

Canso-sirventes

I	1	No m’agrad’ iverns ni pascors
		ni clars temps ni fuoills de garrics,
		car mos enans mi par destrics
		e totz mos majer gaugz dolors,
	5	e son maltrag tnit miei lezer
		e desesperat miei esper;
		e si·m sol amors e dompneis
		tener gai plus que l’aiga·l peis!
		E pois d’amor me sui partitz
	10	cum hom issillatz e faiditz,
		tot’ autra vida·m sembla mortz
		e totz autre jois desconortz.
II		Pois d’amor m’es faillida·il flors
		e·l dolz fruitz e·l grans e l’espics,
	15	don gauzi’ ab plazens prezics
		e pretz m’en sobrav’ et honors
		e·n sabi’ entre·ls pros caber,
		era’m fai d’aut en bas cazer;
		e si no·m sembles fols esfreis,
	20	anc flama plus tost non s’esteis
		q’ieu for’ esteins e relinquitz
		e perdutz en faitz et en digz
		lo jorn qe·m venc lo desconortz
		que non merma, cum qe·m refortz.
III	25	Bels armatz e bos feridors,
		setges e calabres e pics,
		e traucar murs nous et antics,
		e vensser bataillas e tors
		vei et aug; e non puosc aver
	30	ren qe·m puosc’ ad amor valer!
		E vauc cercan ab rics arneis
		gerras e coitas e torneis,
		don sui conqueren enriquitz;
		e pois jois d’amor m’es faillitz,
	35	totz lo mons no·m parri’ us ortz,
		ni mos chans no m’es mais confortz.
IV		Doncs, qe·m val conquistz ni ricors?
		qu’eu ja·m tenia per plus rics
		qand er’ amatz e fis amics,
	40	e·m paissi’ ab n’Engles amors;
		n’amava mais un sol plazer
		que sai gran terr’ e gran aver,
		c’ades on plus mos poders creis
		ai major ir’ ab mi mezeis,
	45	pois mos Bels Cavalliers grazitz
		e jois m’es loignatz e fugitz,
		don mais no·m naissera conortz,
		per q’es majer l’ir’ e plus fortz.
V		Pero no·m comanda valors,
	50	si be·m sui iratz ni enics,
		q’ieu don gaug a mos enemics
		tan q’en perda pretz ni lauzors,
		q’ancar puosc dan e pro tener,
		e sai d’irat joios parer
	55	sai entre·ls Latins e·ls Grezeis;
		e·l marques, que l’espaza·m seis,
		gerreia Blacs e Drogoiz,
		et anc pois lo mons fon bastitz
		nuilla gens non fetz tant d’esfortz
	60	cum nos, cui Dieus a gent estortz.
VI		La marques n’es honratz e sors
		e·l Campanes e·l coms Enricx,
		Sicar, Montos e Salanicx
		e Costantinople socors,
	65	quar gent sabon camp retener,
		e pot hom ben proar en ver:
		qu’anc mais nulha gent non ateis
		aitan gran honor, apareys.
		Per bos vassals, valens, arditz,
	70	es nastr’ emperis conqueritz,
		e Dieus trameta nos esfortz
		coissi·s tray’ a cap nostra sortz!
VII		Anc Alixandres non fetz cors
		ni Carles ni·l reis Lodoics
	75	tan honrat, ni·l pros n’Aimerics
		ni Rotlans ab sos poignadors
		non saubron tan gen conquerer
		tan ric emperi per poder
		cum nos, don poja nostra leis;
	80	q’emperadors e ducs e reis
		avem faitz, e chastels garnitz
		prop dels Turcs e dels Arabitz,
		et ubertz los camins e·ls portz
		de Brandiz tro al Bratz Sain Jorz.
VIII	85	Per nos er Domas envazitz
		e Jerusalem conqueritz
		e·l regnes de Suri’ estortz,
		que·ls Turcx o trobon en lur sortz.
IX		Los pellegris perjurs, fraiditz,
	90	qi nos an sai en camp geqitz,
		qi los manten e cortz es tortz,
		que chascuns val mens vius que mortz.
X		Belhs dous Engles, francx et arditz,
		cortes, essenhatz, essernitz,
	95	vos etz de totz mos gaugz conortz,
		e quar viu ses vas, fatz esfortz.