Jeanroy, Alfred. Les chansons de Jaufré Rudel. Paris: Champion, 1915

Codi: 262,005 Autor: Jaufre Rudel de Blaja Gènere: Vers Número: II

 

Quan lo rius de la fontana

I	1	Quan lo rius de la fontana
		S'esclarzis, si cum far sol,
		E par la flors aiglentina,
		E·l rossinholetz el ram
	5	Volf e refranh ez aplana
		Son dous chantar et afina,
		Dreitz es qu'ieu lo mieu refranha.
II		Amors de terra lonhdana,
		Per vos totz lo cors mi dol ;
	10	E non puesc trobar mezina,
		Si non au vostre reclam
		Ab atraich d'amor doussana
		Dinz vergier o sotz cortina
		Ab dezirada companha.
III	15	Pus totz jorns m'en falh aizina,
		No·m meravilh s'ieu n'aflam,
		Quar anc genser crestiana
		Non fo, ni Dieus non la vol,
		Juzeva ni Sarrazina ;
	20	Ben es selh pagutz de mana,
		Qui ren de s'amor guazanha !
IV		De dezir mos cors no fina
		Vas selha ren qu'ieu pus am ;
		E cre que volers m'enguana
	25	Si cobezeza la·m tol ;
		Que pus es ponhens qu'espina
		La dolors que ab joi sana ;
		Don ja non vuelh qu'om m'en planha.
V		Senes breu de parguamina
	30	Tramet lo vers, que chantam
		En plana lengua romana,
		A·n Hugo Bru per Filhol ;
		Bo·m sap, quar gens Peitavina
		De Berri e de Guïana
	35	S'esgau per lui e Bretanha.