Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Codi: 436,005=282,021b Autor: Simon Doria, Lanfranc Cigala Gènere: Tenso Número: II

 

Segn'en Lafranc, tant m'a sobrat amors

I	1	Segn'en Lafranc, tant m'a sobrat amors,
		q'ieu non conosc lo mal dal be q'ieu n'ai;
		car lo maltraigz m'es tan douza sabors,
		qel gaugz nil bes nom ten pro qant ieu l'ai:
	5	per qu'ien conosc q'a murir m'er, zo sai,
		ni nom partrai, tant son fizels amaire,
		qar cil qui m'a del tot el sieu poder
		mi mostr' orgueil e fai non da dever;
		mas trop me fai pero dol e mal traire.
II	10	Amics Symon, celui sobra follors,
		qi apella maltraig zo que li plai,
		e qi non cern los gaugz de las dolors,
		non sai per qeil venguesson d'amor iai;
		car non grazis lo ben cui non desplai
	15	lo mals, e qi d'aisso non es triaire
		ia noil deu far domna d'amor plazer,
		pos non conois lo gaug dal desplazer:
		nol dic per vos, car nous voil irat faire.
III		Segn'en Lafranc, ben cuidava de vos
	20	conseil trobar, mas ia mais nol qerrai,
		q'enemics etz de totz los amoros
		et anc nous plac azautimen de lai
		don movon tuig bon faig cortes e gai,
		car si fossetz d'amor pres paucni gaire,
	25	ia de triar non agratz tal poder
		qom mi dissetz; mas qar a non chaler
		avetz gitat amor, no m'etz confraire.
IV		Amics Symon, totz los amanz ioios
		hai euamatz totz temps e amarai
	30	e sui dels lur faillimenz doloros.
		E per aizo vos diczo qeus desplai,
		qar diziatz zo q'a dir non s'eschai,
		don corossat vos vei al mieu veiaire;
		mas una ren vos voil ieu far saber,
	35	sim voliatz d'amor conseil qerer:
		seus volgues mal, sius for'ieu conseillaire?
V		Segn'en Lafranc, non sui ges corrossos
		pels vostres digz, mas quar ab cor verai
		amei tos temps mal grat dels enoios
	40	e sui amatz e am e amarai
		feunei qar vei — si tot amors m'atrai
		gaug e plazer em ten el sieu repaire —
		q'ieu muer, eus dicq'ieu non puesc ben aver
		s'eu non remir mi donz matin e ser,
	45	e s'ieu follei, ben l'o puesc ieuretraire.
VI		Ja non degratz esser tan cossiros,
		pos fin' amors tant grant honor vos fai,
		qe ben amatz es mal grat dels gelos,
		amics Symon, e qe demandatz mai?
	50	mais ieu sai ben per ver e sildirai,
		qar vos l'amatz et illvos ses cor vaire
		e non podetz soven aver lezer
		del sieu bel cors embrassar e tener;
		doncs sius doletz, no m'en meravil gaire.
VII	55	Segu'en Lafranc, ieu viu en bon esper,
		car hai chauzit del mon la debonaire.
VIII		Amics Symon, pensatz del retener,
		qe pron avetz conqist al mieu veiaire.