Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 047,009 Autor: Berenguier de Palazol Gènere: Canso Número: IX

 

S'ieu anc per fola entendensa

I	1	S'ieu anc per fola entendensa
		fuy contra·l voler del sen,
		amors, aras me·n repen,
		qu'avertitz mi suy d'aitan
	5	que mais val bona estenensa
		que persegre·l dan,
		e mais qui vol trair' enan
		son sen, que·l nesci talan,
		qui a proat defalhensa.
II	10	Amors, vostra mantenensa
		partetz a guiza d'enfan,
		qu'ieu, quar fatz vostre coman,
		n'ay l'afan e·l marrimen;
		e·n trac midons a guirensa,
	15	quar non li·m defen;
		mas ben pauc fa d'ardimen
		qui contra·l vencut s'empren,
		a cuy degra far valensa.
III		Ben pauc a de retenensa
	20	qui son servizi despen
		ses grat e ses iauzimen;
		pero piegz fai, per semblan,
		e maior desconoyssensa
		selh que vay trichan
	25	selhuy que·l serv e que·l blan;
		e non a vergonha gran
		qui d'aisso non a temensa.
IV		E pus vey que no l'agensa
		qu'ieu n'aya ren mas l'afan,
	30	ia no·m planhon del enian,
		s'ieu per negun falhimen
		trac d'autruy tort penedensa;
		e fora·l pro e gen,
		qu'ie·l servis a mon viven,
	35	o que·l plagues d'avinen
		o que me·n fezes parvensa.
V		Chanson, vai te.n ses bistensa
		a Monpeslier, on s'enten
		gaugz e trobai guerimen;
	40	pueys di·m al comte prezan
		cuy es Tolzas et Argensa,
		s'ieu·n dis mal chantan
		de luy, ni·n menti blasman,
		yeu·n dirai vertat lauzan
	45	ab que·m luenh sa malvolensa.