Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 282,017 Autor: Lanfranc Cigala Gènere: Chanson religieuse Número: XXXIX

 

Oi mair'e filla de Dieu

I	1	Oi mair’e filla de Dieu
		e dels angels reïna,
	3	cui Marc e Luc’e Mathieu
		[e] chascuns sains aclina:
		gardatz mi l’arm’e·l cors mieu,
	6	flors, roza ses espina,
		Deu preian
		que non segon mon enian
	9	m’an iugan,
		mas segon sa merce gran.
II		Qu’eu ai faig dels peccatz tanz
	12	per ma folla follensa
		que, s’ieu vivia mil anz
		en aspra penedensa
	15	—tant sai los faillimenz granz
		qu’eu non agra guirensa,
		s’ab merce
	18	Deus no·m perdon e·m rete
		non per me,
		qu’eu non ai faig lo perque.
III	21	Qu’eu fui fals e mensongiers,
		enveios e raubaire;
		et ab [las]autrui moillers
	24	faillir non doptei gaire;
		e cobes e mal parliers
		fui, e fins galïaire
	27	[e] engres
		s’ieu trobes cui enianes:
		per q’ades
	30	per tot aital mi confes.
IV		E non ai per me poder
		de garir ni baillia:
	32	per que·us veing merce querer,
		glorïosa Maria,
		que mi deingnes tant valer
	35	qu’eu per vos gardatz sia
		de tot mal
		en aquest segle venal,
	39	desleial,
		e·m dones gaug eternal.
V		Si com Dieus fon de vos natz
	42	e·n receup charn humana,
		e·il vostra virginitatz
		remas entier’e sana—
	45	tot aissi·m gardatz, si·us platz,
		d’agaiz de mort suptana.
		Desplazenz
	48	cre qu’eu sia, veramenz
		penedenz
		de trastotz mos faillimenz.