Chiarini, Giorgio. Jaufre Rudel. L'amore di lontano. Roma: Carocci, 2003.

Codi: 262,007 Autor: Jaufre Rudel de Blaja Gènere: Vers Número: VII

 

Qui nos sap esser chantaire

I	1	Qui non sap esser chantaire,
		braire
		deu quant aug lo ver sonar
		clar
	5	e [qant] son per tot mesclat
		prat
		e·l rozal del mati s’espan
		blan
		sobre l’erba josta·l sauza.
II	10	Non aus semblan ni vejaire
		faire
		q’eu l’am, ni l’aus desamar
		ar
		q’en amor son drut mirat
	15	fat
		e·il fals amador ab engan
		van
		cui amor engann’ e bauza.
III		Non es reis ni emperaire
	20	gaire
		qe l’ause·l mantel drechar
		var,
		ni far q’agues acatat
		grat.
	25	Ric me fai la noig en somnian,
		tan
		m’es vis q’en mos bratz l’enclauza.
IV		Lai n’irai el sieu repaire,
		laire,
	30	em peril qom de passar
		mar;
		si de mi no·il pren pitat,
		bat
		fer freg. Las! tan la vau pregan
	35	qan
		ni ja ren de leis me·n jauza.
V		Si no·m vol amar m’amia,
		dia,
		pos eu l’am, s’il m’amara
	40	ja:
		q’eu sui al seu mandamen,
		gen
		li serai si·m vol retener,
		ver
	45	li dirai q’autres i menta.