Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 124,005 Autor: Daude de Pradas Gènere: Canso Número: XXXIX

 

Belha m'es la votz autana

I	1	Belha m'es la votz autana
		del rossinhol em pascor,
		quan fuelh' es vertz e blanca flor
		nays e l'erbet' en la sanha
		e retendeysson li vergier;
		e ioys auria·m tal mestier
		que tot mi reve e·m sana.
II		Estat ai molta setmana
		abrossitz en gran languor,
	10	qu'ieu no puesc viure ses amor,
		et ylh es mi tant estranha
		qu'ie·n trac gran mal en cossirier;
		mas be n'ai guizardon entier,
		si·l ioys qu'ieu vuelh, no·m soana.
III	15	De luenh pot esser probdana
		amors a fin amador;
		e aura greu cor trichador
		as aquel qui plus guazanha;
		qu'ieu ai mai, s'aquesta conquier,
	20	de benanans' ab un denier
		que·l soudas ab Corrossana.
IV		Esbahitz cum cauz' aurana
		vau, e totz ples de doussor
		estau, quan pes de sa valor;
	25	e·n suy de peior companha,
		quar cug sol a un son guerrier,
		que aitals pes fai desturbier
		e cortezia vilana.
V		Si·n aguesioya certana,
	30	miels m'agra doussa sabor,
		per que·m so·l dezirier melhor,
		que s'agues conquista Espanha;
		no me·n tenguatz per ufanier,
		qu'anc no vitz mais a cavallier
	35	tan de ioy, se n'es humana.
VI		Folha gens falsa trefana,
		quar quex si fan trobador,
		fan vers a folh entendedor;
		tal que no pretz una ssanha,
	40	canton e cridon voluntier
		yssamen quo·l plus dreiturier,
		per que chans assorizana.