Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 335,070 Autor: Peire Cardenal Gènere: Chanson religieuse Número: XLIII

 

Vera vergena Maria

I	1	Vera vergena Maria,
		vera vida, vera fes,
	3	vera vertatz, vera via,
		vera vertutz, vera res,
		vera maire, ver’amia,
	6	ver’amors, vera merces:
		per ta vera merce sia
		qu’eret en me tos heres.
	9	De patz, si·t plai, dona, traita
		qu’ap to filh me sia faita.
II		Tu restauriest la follia
	12	don Adams fon sobrepres;
		tu yest estela que guia
		los passans d’aquest paes,
	15	e tu yest l’alba del dia
		don lo tieus filhs solelhs es
		que·l calfa e clarifia,
	18	verais, de dreitura ples.
		De patz, si·t plai, dona, traita
		qu’ap to filh me sia faita.
III	21	Tu fust nada de Suria,
		gentils e paura d’arnes,
		humils e pura e pia
	24	en fatz, en ditz et en pes;
		faita per tal maïstria,
		ses totz mals mas ab totz bes.
	27	Tan fust de doussa paria,
		per que Dieus en tu se mes.
		De patz, si·t plai, dona, traita
	30	qu’ap to filh me sia faita.
IV		Aquel que en te se fia
		ja no·l cal autre defes,
	33	que sitot lo mons peria
		aquel non perria ges;
		quar als tieus precx s’umilia
	36	l’auzismes, a cuy que pes,
		e·l tieus filhs non contraria
		ton voler neguna ves.
	39	De patz, si·t plai, dona, traita
		qu’ap to filh me sia faita.
V		David en la prophetia
	42	dis, en un salme que fes,
		qu’al destre de Dieu sezia,
		del rey en la ley promes,
	45	una reyna qu’avia
		vestirs de var e d’aurfres:
		tu yest elha, ses falhia,
	48	non o pot vedar plaides.
		De patz, si·t plai, dona, traita
		qu’ap to filh me sia faita.
VI	51	Quar latz de Dieu estas, traita
		que·m sia patz de luy faita.