Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 155,012 Autor: Folquet de Marselha Gènere: Canso Número: XXIII

 

Ja non volgra q’hom auzis

I		Ja non volgra q’hom auzis
		los dousz chan[s] de[l]s aucellos
		mas cill qi son amoros,
		qe res tan no m’esbaudis
	5	co·ill aucellet per la plaigna
		e·ill bella cui soi aclis:
		cella·m plasz mais qe chancos,
		volta ne lais de Bretaigna.
II		Be m’agrada e m’abellis,
	10	mais no soi aventuros,
		q’ades es hom cobeitos
		de cho q’es plus grieu conqis;
		donch qe·m val ni qe·m gazaigna
		s’ieu l’am e ill no·m grazis!
	15	Amarai donch en-perdos?
		oc ieu, anceis qe remaigna.
III		Be m’estera s’ades vis
		lo sieu bel cors, gai, joios;
		e qan no vei sas faichos
	20	si be·m soi en mon pais,
		cuig esser loing en Espaigna
		preon entre Sarrazis;
		sol lo veszer m’en es bos
		q’als no aus dir qe re·m taigna.
IV	25	Ferms soi eu be qar soi fis;
		qe s’ieu foss fals ne gignos
		ieu n’hagra pro compaignos,
		mais sa beltatz e·l dolz ris
		mi tolon de lor bargaigna;
	30	qar ill val tan, cho·us plevis,
		qe si sol merces i fos
		ren als no es qi·m soffraigna.
V		Be volgra qe Limozis
		fos plus prop de Mauretaigna,
	35	per cho qe plus sove vis
		lo seinhor q’es larcs e pros
		e tan de bona compaigna.