Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 338,001 Autor: Peire de Corbiac Gènere: Chanson religieuse Número: XLIV

 

Dona, dels anglis rehina

I	1	Dona, dels angils rehina,
		esperansa dels crezens:
	3	segon que m’aonda sens
		chan de vos lengua romana;
		quar nulhs hom iustz ni peccayre
	6	de vos lauzar no·s deu traire,
		cum sos sens mielhs l’aparelha,
		romans o lengua latina.
II	9	Dona, roza ses espina,
		sobre totas flors olens,
		vergua seca frug fazens,
	12	terra que ses labor grana,
		estela del solelh mayre,
		noyrissa del vostre payre:
	15	el mon nulha no·us semelha,
		ni londana ni vezina.
III		Dona, ioves enfantina
	18	fos a Dieu obedïens
		en totz sos comandamens;
		per que la gens crestïana
	21	cre ver e sap tot l’afaire
		que·us dis l’angels saludaire,
		quan receubes per l’aurelha
	24	Dieu, cuy enfantes vergina.
IV		Dompna, verges pura e fina
		ans que fos l’enfantamens
	27	et apres tot eyssamens:
		receup en vos carn humana
		Ihesucristz, nostre salvayre,
	30	si quon ses trencamen faire
		intra·l belhs rays quan solella
		per la fenestra veyrina.
V	33	Dompna, vos etz l’ayglentina
		que trobet vert Moysens
		entre las flamas ardens,
	36	e la toizos de la lana
		que·s mulhet dins la sec’ayre,
		don Gedeons fon proayre;
	39	e natura·s meravelha
		quom remazetz intayzina.
VI		Dompna, estela marina
	42	de las autras pus luzens,
		la mars nos combat e·l vens:
		mostra nos via sertana;
	45	car si·ns vols a bon port trayre,
		non tem naus ni governayre
		ni tempest que·ns desturbelha
	48	ni·l sobern de la marina.
VII		Dona, metiess e metzina,
		lectoaris et enguens:
	51	los nafratz de mort guirens
		lav’e lia, onh e sana;
		dossa, pia, de bon ayre,
	54	fai nos tost de mal estrayre;
		car perdutz es qui sonelha,
		que la mortz l’es trop vezina.
VIII	57	Don’, espoza, filh’e mayre:
		manda·l filh e prega·l payre,
		ab l’espos parl’e consselha
	60	com merces nos si’ayzina.
IX		Nos durmen, mas tu·ns esvelha
		ans que·ns sia mortz vezina.