Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 401,002 Autor: Raimon Gaucelm de Bezers Gènere: Chanson religieuse Número: XLVIII

 

A Dieu done m'arma de bon'amor

I	1	A Dieu done m’arma de bon’amor
		e de bon cor e de tot bon talan;
	3	e tot quant ai atressi li coman
		per tal que·m gar de pen’e de dolor,
		e que·m perdo so qu’ai fag per folhatge,
	6	e que·m garde a la fin de turmen;
		e no·lh plassa qu’ieu fassa lunh passatge
		ni malvestat contra son mandamen.
II	9	D’aisso preguj de cor lo mieu senhor,
		et atressi que non an demembran
		mi ni negun de totz selhs quez estan
	12	en est segle malvat, galïador;
		e quada us pregue·l de bon coratge
		qu’el nos perdo le nostre fallimen
	15	e que·ns meta dedins son bel regnatge
		lo iorn que nos penrem trespassamen.
III		Doncx no·ns prezem, quar petit de valor
	18	avem cascus en est segle truan;
		quar totz homes d’aquest mon poiriran,
		que no·y aura paupre ni ricx honor,
	21	ni ja negus non portara estatge
		que aja fach ni lunh belh bastimen;
		per que deuram pauc prezar lo carnatge,
	24	sol las armas vencson a salvamen.
IV		Quar s’anc fezem per negun temps folhor
		ni lunha re qu’a luy sia pezan,
	27	enqueras tot nos tornara denan,
		segon q’aug dir a quascun confessor.
		E no·us pessetz Dieus y honre paratge;
	30	mar selhs qu’auran fag bon captenemen
		vays elh e [en] sofriran caitivatge
		auran s’amor sobre tot maiormen.
V	33	Doncs ben deuram al rey plen de doussor
		esser humils quascus ab belh semblan,
		quar ses s’amor no valram un aglan,
	36	ans seriam totz ardens en pudor;
		e doncx be fa totz hom gran gazanhatge
		que·l retenga per amic, e gran sen,
	39	e pot o far quascus ses son dampnatge,
		bos faitz fazen et estan lialmen.
VI		En la verge car’ab car piusellatge,
	42	e car en lieys non ac corrompemen,
		devem aver totz bon e ferm coratge
		que per s’amor vengam a salvamen.