Cluzel, Irénée. Princes et troubadours de la maison royale de Barcelone-Aragon. "Boletín de la Real Academia de Buenas Letras de Barcelona", 27 (1957-1958), pp. 321-373.

Codi: 242,022=023,001a Autor: Giraut de Bornelh, Alfons reis d'Aragon Gènere: Tenso Número: I, 2

 

Be·m plairia, Seingner Reis

I	1	Be·m plairia, Seingner Reis,	[Guiraut]
		ab que·us vis un pauc de lezer,
		que·us plagues que·m dissessetz ver
		se·us cujatz qu'en la vostr'amor
	5	a bona domna tant d'onor
		con d'un autre [pro] cavallier;
		e non m'en tengas per guerrier,
		anz mi respondes franchamen.
II		Girautz de Borneill, s'ieu mezeis	[Lo Reis]
	10	no·m defendes ab mon saber,
		ben sa[i] ves on voles tener!
		Per so ben vos tenc a follor
		se·us cujatz que per ma ricor
		vailla menz a drut vertadier.
	15	Aissi vos pogratz un denier
		adesmar contr'un marc d'argen.
III		Si·m sal Dieus, Seigner, mi pareis	[Guiraut]
		de domna qu'entent e valer
		que ja non failla per aver,
	20	ni de rei ni d'emperador
		non fassa ja son amador:
		so m'es vis, ni no·ill a mestier,
		car vos, ricome sobransier,
		non voles mais lo jauzimen !
IV	25	Girautz, e non esta genseis	[Lo Reis]
		si·l rics sab onrar ni temer
		si donz, e·l cor ab lo poder
		l'ajosta ? Co·l te per seingnor
		preza·l doncs menz per sa valor,
	30	se mal no·l troba ni sobrier?
		Ja sol om dir, el reprovier,
		que cel que val mais e mielz pren ?
V		Seingner, mot pren gran mal donmeis	[Guiraut]
		quan pert la cug'e·l bon esper:
	35	que trop val enan del jazer
		l'afars del fin entendedor !
		Mas, vos, ric, quar es plus major,
		demandas lo jaizer premier.
		E domn'a·l cor sobreleugier
	40	c'ama cellui que no·i enten.
VI		Girautz, anc trop rics no·m depeis	[Lo Reis]
		em bona domna conquerer,
		mas en s'amistat retener
		met ben la fors'e la valor.
	45	Si·l ric se fan gualiador
		e tan non amon huei con ier,
		de mi non creas lausengier,
		qu'eu am las bonas finamen.
VII		Seingner, de mon Solatz de Quier	[Guiraut]
	50	volgra ben, e d'En Topinier,
		c'amesson domnas a presen!
VIII		Guirautz, hoc ben, d'amar leugier!	[Lo Reis]
		Mas a mi non dones parier,
		qu'ieu n'ai guazaignat per [un] cen.