Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 248,034=230a,001 Autor: Guiraut Riquier, Guillem Rainier Gènere: Tenso (Partimen) Número: I

 

Guilhem Raynier, pus non puesc vezer vos

I		G[uilhem] Raynier, pus non puesc vezer vos,	[Guiraut]
		parlar yeu vuelh; e digatz m'en chantan
		d'est partimen, qu'ieu vos meti denan,
		cal penriatz per melhor ad estros:
	5	que donzela amassetz lialmen
		e non acsetz mas sol l'aculhir gen,
		o tal veuza que·us fes tot vostre grat
		endreg d'amor? Chauzetz lo pus onrat.
II		Guiraut Riquier, mays vuelh esser joyos	[Guilhem]
	10	de donzela que fassa bel semblan,
		que can [ieu] remir lo cor m'en resplan
		sa gran beutat e so·n pus amoros,
		car donzela ama pus coralmen
		si tot ades no so fa a parven;
	15	per qu'ieu vuelh mays ab lieys parlar mon grat
		que de veuza fezes ma voluntat.
III		[Guilhem] Raynier, mal paretz cobeytos	[Guiraut]
		de l'onrat joy que tug li fin ayman
		enveyan tan, e·n sofron tal afan
	20	que mans n'a mortz, e mi ten cossiros;
		c'amar voletz desesperadamen
		ab l'aculhir, non-poder vos repren.
		Yeu vuelh jauzir so c'ay tant dezirat,
		e vos lang[u]etz ab cor desesperat.
IV	25	Guiraut Riquier, yeu ay mantas sazos	[Guilhem]
		gaug e deport ab lieys on pretz s'espan,
		que bel parlar me dona joia gran,
		e tenc mon cors alegre e joyos,
		e l'aculhir dona·m tant d'ardimen
	30	que no·m menbra degun mal pessamen;
		mays la veuza c'a so marit uzat
		uzara vos ab sa falsa beutat.
V		Anc no·us destreys Amors, n'ayman ginhos,	[Guiraut]
		que l'onrat joy sieu metatz en soan
	35	per l'aculhir; es amatz ab enjan
		ses tot respieg, e sirvetz en perdos,
		G[uilhem] Raynier, car res no·l falh viven
		a sel que pot complir tot son talen,
		e si·l veuza blasmatz de falsetat,
	40	a·l donzela aytal dizetz vilta<t>.
VI		Trop poyria durar nostra tenso[s],	[Guilhem]
		amicx Guiraut, et anem no·n layssan,
		pero be·us dic que la veuza soan
		per l'aculhir, don m'aonda razos,
	45	que·l donzela m'acuelh tan dossamen
		c'ap si reten tot mon cor e mon sen,
		e pus yeu puesc ab leys parlar mon grat,
		del partimen ay tot lo miels triat.
VII		Raynier, chauzit avetz nessïamen;	[Guiraut]
	50	en Dardasier prec qu'en don jutjamen,
		que falhitz es et yeu ay vo·n proat,
		car per longuier laissatz joy acabat.
VIII		Guiraut Riquier, ades mi ten jauzen	[Guilhem]
		la donzela, can vey son bel cors gen;
	55	en Dardassier diga·n la veritat
		cals de nos dos a pres lo pus onrat.