Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 461,215 Autor: Anonyme Gènere: Chanson religieuse, chanson de pénitence Número: LV

 

Qui vol savi viur'e membradament

I	1	Qui vol savi viur’ e membradament
		en aquest mon, non sia trop curos
	3	d’acapt’ aver [a] prezent ni a rescos:
		car hom no·l pot gauzir durablament;
		per que cascus deu aver sovinensa
	6	de sos peccatz e faire penedensa,
		car d’aquest mont es sobeirana flos
		qui pot tornar [omne] peccaire bos,
II	9	Sol la prena ben ez adrechament
		e la fassa am fin cor coraios
		quex tro la fin, segon q’er poderos,
	12	c’ar non quer mais ni plus so letament.
		Dons prena hom los bens en mantenensa,
		ez en vil mal non ai’ om s’entendensa;
	15	ans si’ hom ben pentens e consiros
		de sels c’a·n fatz, an gran contreccïos.
III		Car enaissi ho deu far bonament
	18	homs que volra intrar el ioy plentos
		ni posezir per tostems ses coros:
		que dezampar totz sos malvatz talent
	21	e sierva Dieu ab gran hobedïensa,
		ez en la fe aya bona crezensa,
		e vuell’ hobrar segon los bons sermos
	24	que auzira del bons prezicados.
IV		Car qui ben aus e ben es retenent
		contra l’autres a grans meilhurazos
	27	que aus lo ben e l’auzir non l’es bos;
		car no reinha pas ben ni saviament
		sel que s’ arma gieta a mesprezensa,
	30	e si [va am] malvaiza conoisensa
		–car lais’ a va so c’a plus aondos–
		ses remedi a tormens perilhos.