Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Codi: 177,001 Autor: Gormonda Gènere: Sirventes (de réponse) Número: V

 

Greu m'es a durar, quar aug tal descrezensa

I	1	Greu m’es a durar, quar aug tal dezcrezensa
		Dir ni semenar, e nom platz ni m’agensa,
		Qu’om non deu amar qui fai desmantenensa
		A so don totz bes
	5	Ven e nais et es,
		Salvamens e fes. Per qu’ieu farai parvensa
		E semblan quem pes.
II		Nous meravilhes negus si eu muou guerra
		Ab fals mal apres qu’a son poder soterra
	10	Totz bos faitz cortes els encauss’ els enserra;
		Trop se fenh arditz,
		Quar de Roma ditz
		Mal, qu’es caps e guitz de totz selhs que en terra
		An bos esperitz.
III	15	En Roma es complitz totz bes, e quils li pana,
		Sos sens l’es falhitz, quar si meteis enguana,
		Qu’elh n’er sebelitz, don perdra sa ufana.
		Dieus auja mos precx,
		Que selhs qu’an mals becx,
	20	Joves e senecx, contra la lei romana,
		Cajon dels bavecx.
IV		Roma, selhs per pecx tenc totz e per gent grossa,
		Per orbs e per secx que lur carn e lur ossa
		Carguon d’avols decx, don cazon en la fossa,
	25	On lur’es sermatz
		Pudens focx malvatz;
		Don mais desliatz no seran de la trossa,
		Qu’an de lurs peccatz.
V		Roma, ges nom platz qu’avols hom vos combata,
	30	Dels bos avetz patz, qu’usquecx ab vos s’aflata.
		Dels fols lurs foldatz fes perdre Damiata,
		Mas li vostre sen
		Fan sel ses conten
		Caitiu e dolen que contra vos deslata
	35	Ni renha greumen.
VI		Roma, veramen sai e cre ses duptansa
		Qu’a ver salvamen aduretz tota Fransa,
		Oc, e l’autra gen queus vol far ajudansa.
		Mas so que Merlis
	40	Prophetizan dis
		Del bon rei Lois, que morira en pansa,
		Aras s’esclarzis.
VII		Piegz de Sarrazis e de pus fals coratge
		Heretjes mesquis son. Qui vol lur estatge:
	45	Ins el foc d’abis van s’en en loc salvatge
		En dampnatio.
		A selhs d’Avinho
		Baisses, don m’es bo, Roma, lo mal pezatge,
		Don grans merces fo.
VIII	50	Roma, per razo avetz manta destorta
		Dressad’a bando et oberta la porta
		De salvatio, don era la claus torta,
		Que ab bon govern
		Baissatz folh esquern.
	55	Qui sec vostr’ estern, l’angel Michel lo’n porta
		El garda d’ifern.
IX		L’estiu e l’yvern deu hom ses contradire
		Roma, lo cazern legir, si que nos vire,
		E quan ve l’esquern, cum Jhesus pres martire,
	60	Albir se lo cas
		Si’s bos crestias,
		. . . . . . . . . . s’adoncx non a cossire,
		Totz es fols e vas.
X		Roma, lo trefas e sa leis sospechoza
	65	Als fols digz vilas par que fos de Toloza,
		On d’enjans certas non es doncx vergonhoza.
		Ni ans de dos ans
		Mas sil coms prezans
		Cove quels engans lais e la fe duptoza
	70	E restaurels dans.
XI		Roma, lo reis grans qu’es senhers de dreitura
		Als falses Tolzans don gran malaventura,
		Quar contra sos mans fan tan gran desmezura,
		Qu’usquecx lo rescon,
	75	E torbon est mon;
		El comte Raimon, s’ab elhs plus s’asegura,
		Nol tenrai per bon.
XII		Roma, bes cofon e val li pauc sa forsa,
		Qui contra vos gron ni bast castelh ni forsa,
	80	Quar en tan aut mon nos met ni no s’amorsa
		Que dieus non recort
		Son erguelh el tort
		. . . . . . . . don pert tota s’escorsa
		E pren dobla mort.
XIII	85	Roma, bem conort quel coms ni l’emperaire,
		Pueis que son destort de vos, non valon gaire,
		Quar lur folh deport e lur malvat vejaire
		Los fa totz cazer
		A vostre plazer,
	90	Qu’us nos pot tener, sitot s’es guerrejaire,
		Non li val poder.
XIV		Roma, ieu esper que vostra senhoria
		E Fransa per ver, cui non platz mala via,
		Fassa dechazer l’erguelh e l’eretgia.
	95	Fals heretges quetz,
		Que non temon vetz
		Ni crezols secretz, tan son ple de feunia
		E de mals pessetz.
XV		Roma, be sabetz que fort greu lor escapa,
	100	Qui au lor decretz, aissi tendon lur trapa
		Ab falses trudetz, ab que quascus s’arrapa.
		Totz son sortz e mutz,
		Qu’el lur tolh salutz,
		Don quecx es perdutz, qu’ilh n’an capelh o capa,
	105	E remanon nutz.
XVI		Clauzis e sauputz naisson senes falhida
		Crematz e perdutz que lur malvada vida
		Ans negon vertutz, car fe noi es auzida
		Non avem sivals.
	110	E si fos lejals
		Lor vida mortals, dieus crei l’agra eissauzida,
		Mas non es cabals.
XVII		Qui vol esser sals, ades deu la crotz penre
		Per heretjes fals dechazer e mespenre,
	115	Quel celestials hi venc sos bras estendre
		Tot per sos amicx;
		E pus tals destricx
		Pres, ben es enicx selh que nol vol entendre
		Ni creirels chasticx.
XVIII	120	Roma, si pus gicx renhar selhs queus fan onta
		Al sant esperitz, (quant hom lor o aconta,
		Tan son fol mendicx qu’us ab ver no s’afronta)
		Noi auras honor.
		Roma, li trachor
	125	Son tan ples d’error qu’on plus pot, quascus monta
		Quec jorn sa folor.
XIX		Roma, fol labor fa [qui ab] vos tensona,
		De l’empe[rador dic, s’]ab vos no s’adona,
		Q[u’en gran] deshonor ne venra s[a corona
	130	E] sera razos;
		Mas per[o ab vos
		Leu] troba perdos qui g[en sos tor]tz razona
		Ni n’es an[goissos.]
XX		Romal glorios que a la Magdalena
	135	Perdonet, don nos esperam bona estrena,
		Lo folh rabios que tans ditz fals semena,
		Fassa d’aital for
		Elh e son thezor
		E son malvat cor morir e d’aital pena,
	140	Cum heretjes mor.