Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 248,077=272,001=403,001=319,007a Autor: Guiraut Riquier, Jordan de l'Isle-Jourdain, Raimon Izarn, Paulet de Marselha Gènere: Tenso (Partimen) Número: VI

 

Senh'en Jorda, sie·us manda Livernos

I		Senh'en Jorda, sie·us manda Livernos	[Guiraut]
		a si venir e Lautresc en un dia
		sol per vezer, a cal atendretz vos?
		E que sapchan d'ambas partz vostra via.
	5	Et a·n R[aymon] Yzarn en eyssa guia
		na Marqueza e na Sayssa la pros;
		et a·n Paulet lo valen rey n'Anfos
		e sel que ten Polha en sa baylia
		per cor de dar; [e] quecx prena la tria.
II	10	Anc no·m partic dejusta Livernos,	[Jordan]
		Guiraut Riquier, ans lo vey on que sia,
		per que·m tenrai drech a Lautrec cochos
		per vezer lieys, on joy ab pretz se lia;
		que vuelh vezer, car, si tost no vezia
	15	son gentil cors e sas plazens faissos,
		no·m tenria per adreg amoros,
		car ab bels ditz lia gent e deslia
		et ensenha, qui ja res no sabia.
III		Guiraut Riquier, anc Guiraudet lo Ros	[R. Izarn]
	20	no fon destretz per sidons en tal guia
		coma yeu soy per la genser c'anc fos,
		e res no·n sap, si non s'o conoisia;
		e Marqueza, si vezer la podia
		salvan s'onor, veyria volontos;
	25	que na Saisa, si tot s’a bel respos
		ni·s parla gen, no·m play tant ni·m plairia
		com Marqueza, qu'es ses par de cundia.
IV		Guiraut Riquier, ges no soy cossiros	[Paulet]
		de penre tost en aquesta partia;
	30	e vuelh vezer l'onrat rey cabalos
		de Polha, que met jos falsa clersia,
		c'auzit ai dir qu'el val ses maystria;
		c'autra vetz ay vist selh que bon'anc fos,
		lo valen rey a cuy s'apen Leos.
	35	Et autra vetz partetz me joc que sia
		de fag d'amors, non jes de joglaria.
V		Senh'en Jordan, pres avetz a ma guia,	[Guiraut]
		pero R[aimon] Yzarn ditz ad estros
		aquo que ditz; e si es amoros
	40	si co yeu soi, en Pauletz, greu no·l sia
		s'ieu l'ay partitz joc que per mi volria.