Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Codi: 080,013 Autor: Bertran de Born Gènere: Sirventes Número: XI

 

D'un sirventes no·m cal far loignor ganda

I	1	D’un sirventes no·m cal far loignor ganda,
		Tal talan ai que·l diga e qe l’espanda,
		Car n’ai razon tant novella e tant granda
		Del Joven Rei q’a fenit sa demanda
	5	Son frair Richart, pois sos paire·l comanda ;
		Tant es forsatz !
		Pois N’Aenrics terra non ten ni manda,
		Sia reis dels malvatz !
II		Que malvatz fai, car aissi viu a randa
	10	De liurazon a comte et a garanda.
		Reis coronatz que d’autrui pren liuranda
		Mal sembla Arnaut lo marques de Belanda,
		Ni·l pro Guillem que conquis Tor Mirmanda,
		Tant fon presatz !
	15	Pos en Peitau lor ment e lor truanda,
		No·i er mais tant amatz.
III		Ja per dormir non er de Coberlanda
		Reis dels Engles ni conqerra Yrlanda
		Ni tenra Angieus ni Monsaurel ni Canda
	20	Ni de Peiteus non aura la miranda ;
		Ni sera ducs de la terra normanda
		Ni coms palatz
		Ni de Bordels ni dels Gascos part Landa
		Seigner ni de Basatz.
IV	25	Conseill vuoill dar el son de “N’Alamanda”
		Lai a·N Richart, si tot no lo·m demanda :
		Ja per son frair mais sos homes non blanda.
		Nonca·is fai el, anz asetga e·ls aranda,
		Tol lor chastels e derroca et abranda
	30	Devas totz latz.
		E·l reis tornei lai ab cels de Garlanda
		E l’autre, sos coignatz.
E		Lo coms Jaufres, cui es Bresilianda,
		Volgra fos primiers natz,
E'	35	Car es cortes, e fos en sa comanda
		Regesmes e duchatz.