Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 154,002b=248,043 Autor: Folquet de Lunel, Guiraut Riquier Gènere: Tenso (Partimen) Número: VII

 

Guirautz, don'ap beutatz granda

I		Guirautz, don'ap beutatz granda	[Folquet]
		tota sola jatz
		en un lieg, e selh que·l platz
		jatz n'en autre ses demanda
	5	que l'us a l'autre no fay,
		et amo·s de cor verai:
		si·l cavaiers se leu ab lieys jazer,
		o ilh ab luy, cal li deu mai plazer?
II		S'ieu laissava per pueg landa	[Guiraut]
	10	semblaria fatz,
		Folquetz, e soy m'acordatz,
		pus entr'els amors s'abranda
		e demans no si eschai,
		c'al ai man deu plazer may
	15	qu'elh an vas lieys, et ela que·l n'esper,
		que s'ilh a luy vay ses s'amor querer.
III		En Guiraut, dretz es que blanda	[Folquet]
		la dona l'amatz
		amicx; pero pus assatz
	20	li deu plazer, s'Amor manda
		la dona, que se·n a<n> lay
		o sos fis amans se jay;
		car Amors pren en totas res poder,
		non la·n deu hom blasmar si·l vay vezer.
IV	25	Folquetz, fin'amors comanda	[Guiraut]
		c'amans afinatz,
		pus s'es a don'autreyatz,
		li port tot onor sens ganda;
		et yeu que conosc e say
	30	que non tanh fassa qu'il play
		ela, ni el non o deu pas voler,
		ans seretz vos blasmatz del mantener.
V		En Guiraut, de temor branda	[Folquet]
		·l fis enamoratz,
	35	que non auza far sos gratz
		tant que san colcar arranda
		de sidons; e s'ilh mal trai
		per s'amor, s'ela s'en vay
		al cavayer no fay so non-dever,
	40	pus que conoys qu'ilh n'estay per temer.
VI		Vostra razos es truanda,	[Guiraut]
		Folquetz, car mandatz
		temer l'aman, pus l'es datz
		locx on sos jauzirs s'espanda;
	45	sembla que del joy s'esmay,
		e dizetz, de que·m desplay,
		que·l dona·s va·n a luy per son dever:
		vos et ilh duy devetz vergonh'aver.
VII		Be[ls] senhers, c'a pretz veray,	[Folquet]
	50	de Canpendut, s'a luy play,
		jutg', en Guiraut, si deu melhor saber
		al cavayer s'il vay sidons vezer.
VIII		Folquetz, son dig ne vuelh may	[Guiraut]
		que d'autre, car bon dreg vay,
	55	qu'el sap d'amors e d'als rar son dever,
		e sabra·n grat et honor conquerer.